Uly Jibek joly elderiniń rýhanı kartasyn jasaý qajet - Serikbaı qajy Oraz

NUR-SULTAN. QazAqparat - Uly Jibek joly elderiniń rýhanı kartasyn jasaý qajet. Búgin elordada ótip jatqan "Rýhanı Jibek joly. Islam jáne jastar: qazirgi zamanǵy syn-qaterler" taqyrybyndaǵy IV halyqaralyq dinı-ǵylymı konferentsııa barysynda Qazaqstan musylmandary dinı basqarmasynyń tóraǵasy Serikbaı qajy Oraz osyndaı usynys jasady, dep habarlaıdy QazAqparat tilshisi.

"Ótkensiz bolashaq joq. Biz ótkennen ónege alǵan halyqpyz. Osy rette áriptesterime Uly Jibek joly elderiniń rýhanı kartasyn jasaýdy usynamyn. Rýhanı karta óskeleń urpaqtyń tarıh pen rýhanııat salasyna qatysty suraqtaryna jaýap beretin beınebir baǵdarsham, shamshyraq bolýy tıis", - dedi Serikbaı qajy Oraz.

Sonymen qatar ol Uly Jibek joly tek saýda men ekonomıkanyń, órkenıet pen mádenıettiń ortalyǵy ǵana emes, túrli dinderdiń taralý aımaǵy bolǵany tarıhtan belgili ekendigine nazar aýdartty.

"Osy rette ata dinimizdiń Jibek joly boıyndaǵy qalalarda tereń tarala bastaǵanyn aıryqsha atap ótkim keledi. Tipti, tarıhı derekterde- Islam dininiń býdda, hrıstıan dinderin, zoroastrızmdi yǵystyryp, ysyryp, qanatyn keńge jaıǵany aıtylady. 853 jyly Taraz ben Merke shaharynda ózge dinniń ǵıbadathanasy meshitke aınalǵany jaıly senimdi málimetter kezdesedi", - dedi Bas múftı.

QMDB tóraǵasy tarıhı qalalarda úlken meshitterdiń salyný sebepteri Islam dinin ustanatyn halyq sanynyń kóbeıýimen túsindiriletindigin aıtty.

"Biz, din qyzmetkerleri, tarıhshy-ǵalymdar, zııaly qaýym ókilderi tarıhymyzdyń osynaý sáýleli sátterin urpaqqa jan-jaqty nasıhattaı bilgenimiz abzal", - dedi Serikbaı qajy Oraz.