Uly Jeńistiń mán-maǵynasy men úshin óte erekshe - Oral Muhamedjanov
Bul týraly búgin «Otan qorǵaýshylar» monýmentiniń alańynda jýrnalıster saýalyna jaýap berý kezinde Parlament Májilisiniń Tóraǵasy Oral Muhamedjanov aıtty, dep habarlaıdy QazAqparat.
«Búgin - Otan qorǵaýshylar kúni, al eki kúnnen keıin Uly Jeńistiń 65 jyldyǵy merekelenedi. Bul eki mereke de bizdiń el úshin óte qymbat ári qurmetti sanalady. Osyǵan baılanysty barsha Qazaqstan halqyn osy ataýly kúnmen quttyqtaǵym keledi. Elimizdiń aspany ashyq bolyp, beıbit ómir asqaqtaı bersin. Osy yntymaǵymyz, birligimiz baıandy bolsyn. Ata-babalarymyz qarý ustaǵan náýbetti kúnder halqymyzdyń basyna endi tónbesin. Biz osy ózimizdiń tereń eńbegimizben, Otanǵa degen qurmetimizben, mahabbatymyzben qorǵanýymyz kerek»,- dedi Májilis Tóraǵasy.
«Meniń ákem Uly Otan soǵysyna qatysqan. Birneshe márte marapattalǵan maıdanger. ıAǵnı, bizdiń áýletimizden kóp azamat bul soǵysqa qatysty, atap aıtqanda ákemniń eki aǵasy da maıdanda bolǵan ardagerler. Sondyqtan bul Uly Jeńistiń mán-maǵynasy men úshin óte erekshe»,- dedi O. Muhamedjanov.
