Uly Jeńistiń 70 jyldyǵyna oraı qazaqstandyq ardagerler ózderi maıdanǵa qatysqan elderge saparlaıtyn bolady
ASTANA. QazAqparat - Uly Otan soǵysyndaǵy Jeńistiń 70 jyldyǵyn merekeleý aıasynda ardagerlerge materıaldyq kómekke 5,7 mlrd. teńge qarastyryldy. Bul týraly QR Densaýlyq saqtaý jáne áleýmettik damý mınıstrliginiń selektorlyq rejimdegi alqa otyrysynda osy vedomstvonyń basshysy Tamara Dúısenova málim etti, dep habarlandy baspasóz qyzmetinen.
«2015 jyly Uly Otan soǵysyndaǵy Jeńistiń 70 jyldyǵyn atap ótemiz. UOS ardagerlerge jáne tyl eńbekkerlerine materıaldyq kómek kórsetýge, ardagerlerdiń Astana men Máskeýde ótetin merekelik sherýlerge qatysýyna respýblıkalyq bıýdjetten 5,7 mlrd. teńge baǵyttalady», - dedi mınıstr.
Sonymen qatar T. Dúısenova osy sharalar aıasynda ardagerlerdiń ózderi maıdanǵa qatysqan elderge aqysyz saparlary qarastyrylyp otyrǵandyǵyn atap ótti.
