Uly Jeńistiń 70 jyldyǵyna arnalǵan qaıyrymdylyq kontsert ótedi

ASTANA. QazAqparat - 19 aqpanda «Astana» Ulttyq sýret galereıasynyń zalynda «Frantsııa mýzykasy» oryndalady. Kesh «Astana Opera» teatry málimdegen Uly Jeńistiń 70 jyldyǵyna arnalǵan qaıyrymdylyq kontsertter aıasynda ótedi. Bul týraly elorda ákimdiginiń resmı saıtynda habarlady.

Teatr jyl boıy osy aıryqsha oqıǵaǵa oraılastyrylǵan 12 kontsert ótkizýdi josparlap otyr. Olardyń basty maqsaty - tyńdarmanǵa klassıkalyq ónerdi tamashalaýǵa múmkindik berý.

Bul kúni tyńdarmandar frantsýz kompozıtorlardyń shyǵarmashylyǵymen tanysady. Atap aıtqanda, elordalyq kórermen tamashalaıtyn týyndylar: Gabrıel Foreniń «Pavana», Ernest Shossonnyń orkestr men skrıpkaǵa arnalǵan poemasy, 25 or. jáne Jak Iberdiń orkestr men fleıtaǵa arnalǵan kontserti, K. Sen-Sanstyń «Ajaldyń bıi».

«Pavana» - bul saraı mańynda oryndalatyn ıspandyq baıaý yrǵaqty bıi. Mýzykatanýshylardyń aıtýynsha, Gabrıel Fore atalǵan mýzykalyq shyǵarmasy arqyly frantsýzdardyń ıspan mýzykasyna degen qyzyǵýshylyǵyna laıyqty baǵasyn berdi. Týyndy, quramyna ishekti jáne qos-qostan fleıta, goboı, klarnet, fagot jáne kerneı kiretin shaǵyn orkestrge arnalǵan. Alaıda «Pavananyń» keń taraǵany sonshalyqty, onyń aspaptyń kóptegen túrinde oryndalǵan nusqalaryn kezdestirýge bolady.

Ernest Shossonnyń orkestr men skrıpkaǵa arnalǵan poemasy tyńdarmannyń erekshe yqylasyna laıyqty. Bul týyndy álemdik skrıpkalyq repertýarda turaqty oryn teýip, qazirgi ýaqytta kompozıtordyń eń kóp oryndalatyn shyǵarmasy bolyp tabylady. Kesh baǵdarlamasynda sondaı-aq, HH ǵasyrdyń birinshi jartysynda ómir keshken belgili frantsýz kompozıtory Jak Iberdiń Orkestr men fleıtaǵa arnalǵan kontserti bar. Iber týyndyny 1932 jyly jazǵan jáne ol XX ǵasyrdaǵy frantsýz fleıta mektebiniń alyp tulǵalarynyń biri Marsel Moızge arnalǵan.