Uly Jeńistiń 65 jyldyǵyna baılanysty TMD halyqtary men álemdik qoǵamdastyqqa úndeý jasaldy
***
Táýelsiz Memleketter Dostastyǵyna qatysýshy elderdiń memleket basshylarynyń 1941-1945 jyldardaǵy Uly Otan soǵysyndaǵy Jeńistiń 65 jyldyǵyna baılanysty Dostastyq elderiniń halyqtary men álemdik qoǵamdastyqqa
ÚNDEÝІ
Táýelsiz Memleketter Dostastyǵyna qatysýshy memleketterdiń halyqtary 2010 jyly mamyrdyń 9-ynda 1941-1945 jyldardaǵy Uly Otan soǵysyndaǵy Jeńistiń 65 jyldyǵyn atap ótedi. Sonaý bir zulmat jáne qandy soǵysta Keńes Odaǵynyń kópultty halqy men onyń Qarýly kúshteri bostandyqtaryn jáne óz Otanynyń táýelsizdigin qorǵap qaldy, álemniń kóptegen elderin fashıstik quldyqtan azat etti.
Maıdanda jáne tylda bizdiń halyqtarymyz tabandylyq pen batyrlyq, otansúıgishtik jáne qaırattylyq, ınternatsıonalızmdik qasıetter kórsetti, onsyz jeńis kelmeıtin edi. Tarıh buryn-sońdy mundaı tabandylyqty kórgen joq. Tarıh jeńiske degen munshalyqty erikti de bilgen emes.
Jyldar ótse de, halyqtarymyz jasaǵan erliktiń ulylyǵy azaımaq emes. Sonaý oqıǵadan ýaqyt ótken saıyn, bolashaqty qutqaryp qalǵan Jeńis sarbazynyń tarıhı mıssııasynyń mańyzy arta túsýde. Sondyqtanda Dostastyq elderiniń halyqtaryna jáne álemdik qoǵamdastyqqa úndeý jasaı otyryp, biz búginde memleketterimizde turyp jatqan kózi tiri ardagerlerge «rahmetimizdi» aıtamyz. Jeńimpaz batyrlarǵa tek sózben ǵana emes, ispen de qurmet kórsetýge, soǵys ardagerleri men tyl eńbekkerlerine kúndelikti qamqor jasaýǵa, olarǵa laıyqty ómir jaǵdaılaryn jasaýǵa shaqyramyz.
Mamyrdyń 9-y - Jeńis kúni - bizdiń halyqtarymyz úshin ádildik ornaǵan, maqtan etetin jáne sonaý zulmat soǵysta qaza bolǵan mıllıondaǵan adamdardy jalpy halyq bolyp aza turatyn kún. Uly Otan soǵysy jyldary erlikpen qaza tapqandardyń esimderi bizder úshin qasıetti. Óz ómirlerin Otany úshin, ıaǵnı bizdiń bostandyǵymyz úshin pıda etkenderdiń aldynda biz ómir boıy boryshtarmyz.
Biz álemdi fashızmnen qutqarǵan jaýyngerler men tyl eńbekkerleriniń erlikterin umytpaımyz. Sondyqtan da biz óz Otanynyń azattyǵy men táýelsizdigi úshin qaza tapqandardy eske alyp, qurmetteýge, jaýyngerler zırattaryn, memorıaldyq keshenderdi, eskertkishter men obelıskilerdi, sondaı-aq partızandardyń, fashıstik lagerlerdiń tutqyndarynyń zırattaryn turaqty qamqorlyqqa alýǵa, Uly Otan soǵysy jyldary fashıstik basqynshylardyń qolynan qaza tapqan jaýyngerler men beıbit azamattardyń súıekterin izdeýge shaqyramyz.
Biz Jeńisti bizdiki jáne basqaniki dep bólmeımiz, natsızmge qarsy kúresken barsha halyqtyń erlikterine bas ıemiz. Biz Jeńiske atsalysqan antıgıtlerlik koalıtsııadaǵy odaqtastarymyzdyń úlesterin, olardyń bizge kórsetken kómekterin umytpaımyz. Biraq, eń aýqymdy, ıaǵnı basty oqıǵalar keńes-german maıdanynda oryn aldy. Bizdiń elderimiz soǵys jyldary mıllıondaǵan azamattarynan aıryldy. Shaıqas dalasynda qaza tapqandardyń arasynda túri ulttyń adamdary boldy.
Bizdiń memleketterimizdiń halyqtary Jeńiske sheshýshi úles qosqanyn eskere otyryp, óskeleń urpaqty erlikke toly ortaq tarıhymyzdy jáne fashızmmen kúrestegi uly erlikti maqtan tutýǵa baýlýǵa shaqyramyz.
Jalpyǵa ortaq qaǵıdalar men halyqaralyq quqyq normalaryn, BUU Jarǵysy men Helsınkı Qorytyndy aktisiniń baptaryn ustana beretinimizdi qýattaı kele, biz álemdegi qaýipsizdik pen turaqtylyqty nyǵaıtý jolynda belsendi áreket etýge, halyqaralyq lańkestikpen pen ekstremızmmen kúresýdegi kúsh-jigerdi eseleýge, oryn alyp otyrǵan jáne bolýy yqtımal qaqtyǵystardy beıbit saıası jolmen retteýge shaqyramyz.
