Uly Jeńiske 75 jyl: Óner juldyzdary merekelik onlaın kontsert beredi
«Uly Jeńis kúni el jadynda máńgilik qalatyn tarıhı mereke. «Qazaqkontsert» ujymy barsha qazaqstandyqtardy osy merekemen quttyqtaıdy. Ásirese soǵysta aldyńǵy qatarda bolǵan batyrlar men tylda júrip erlik kórsetken ardagerlerimiz úshin bul erekshe kún. Bul oraıda merekelik kóńil-kúı syılaıtyn is-sharalardyń orny bólek. Osy arqyly biz batyr babalarymyzdyń jaýyngerlik joly men qaısarlyǵyn nasıhattap, án-jyrǵa qosyp, jas urpaqtyń sanasyna sińire bilýimiz kerek. Qazaqkontsert usynatyn bıylǵy merekelik is-sharalar kesheni onlaın formatta ótkizilmek«,- dep atap ótti «Qazaqkontsert» MKU dırektory Jeńis Seıdýllauly.
Qazaqkontsert ártisteri beıbit ómir syılaǵan batyr babalarymyzdyń rýhyna, soǵys jáne tyl ardagerleriniń erligine taǵzym etip, ózderiniń shynaıy alǵystaryn barshaǵa belgili poezııalyq týyndylar arqyly jetkizdi. Onlaın formatta «Soǵystan qaıtqan soldattar», «Jdı menıa», «Lenıngradtyq órenim» óleńderi oqyldy. Onlaın quttyqtaý «Qazaqkontsert» uıymynyń Instagram paraqshasynda «Erlikke taǵzym» atty jańa rýbrıka aıasynda jarııalandy.
Jeńis kúnine arnalǵan is-sharalar baǵdarlamasyn «Karantındegi juldyz» jobasynyń tikeleı efırinde kórsetiletin merekelik onlaın kontsert jalǵastyrady. Óner súıer qaýym Live formatyndaǵy jańa kontsertti «Qazaqtelekom» AQ YouTube arnasynan kóre alady. Bul keshte opera jáne estrada óneriniń tanymal ánshileri Medeý Arynbaev, Azamat Jyltyrkózov, Erlan Rysqalı, Igor Blagodarnyı, Meıir Baınesh, Bıbigúl Januzaq, Alfııa Karımova, Rústem Nurjigit, Azat Málik, Dına Mırmanova óner kórsetedi.
Áleýmettik jelilerden bólek, kórermender «Qazaqkontsert» uıymy daıyndaǵan «Jeńis týy, jelbire!» atty merekelik kontserttiń telekórsetilimin tamashalaı alady. Estelikterge toly erekshe kontsert «KAZAKH TV» telearnasynan kórsetiledi.
