ULY JEŃІSKE 70 JYL: Tapsyrylmaǵan orden tarıhy

ASTANA. QazAqparat - Uly Otan soǵysy maıdanyndaǵy erlik pen qaharmandyqtyń úlgisin kórsetken sarbazdardyń talaıy ártúrli memlekettik marapattarǵa usynylǵan. Árqıly sebeptermen mundaı marapattardyń kezinde ıelerine tapsyrylmaı qalǵan kezderi de az emes. Almaty qalasynda turatyn Tileýbala Qojahmetovanyń osyndaı oqıǵalardyń biri jóninde syr shertken haty búgin «Egemen Qazaqstan» gazetinde jarııalandy.

«Bizdiń ákemiz Kákimbaı Súleımenuly Qojahmetov 1922 jyly Qapal aýdanynyń Qońyr aýylynda dúnıege kelgen. Qyzyl armııa qataryna 1942 jyly Qapal aýdandyq áskerı komıssarıaty arqyly shaqyrylǵan. Áýeli 11-gvardııalyq tank korpýsynyń rota komandıri retinde talaı shaıqasqa túsip, Ýkraınanyń Ahtyrka qalasynyń mańyndaǵy urysta oń ıyǵynan aýyr jaralanady. Emdelip shyqqannan keıin sol korpýstyń desant rotasynyń komandıri retinde soǵys jolyn jalǵastyrady, - dep jazady T.Qojahmetova óziniń hatynda. - 1944 jyly Batys Ýkraınany fashıst bas­qynshylarynan azat etý urystaryna qa­tysyp, 1945 jyly qańtarda Germanııa jerinde aýyr jaraqat alady. Al mamyr aıyndaǵy jeńisti Groznyı qalasyndaǵy gospıtalda qarsy alady. Qan maıdandaǵy erlikteri úshin Qyzyl Juldyz ordenimen jáne birneshe medalmen nagradtalǵan.

Meniń endigi aıtpaǵym, ákemiz Kákimbaı Qojahmetov Ýkraınanyń Ahtyrka qala­synyń mańyndaǵy shaıqasta aýyr jara­lanyp, sol urysta kórsetken erligi úshin II dárejeli Uly Otan soǵysy ordenine usynylǵan. Bul jóninde Joǵarǵy Keńestiń nagradtaý týraly Jarlyǵynyń tabylǵanyn aıtqym kelip otyr.

2012 jyly ákemiz dúnıeden ótip, kóńi­limiz qulazyp júrgen kúnderi Reseı úki­metiniń Uly Otan soǵysynyń muraǵatta saqtaýly jatqan qujattaryn «Podvıg naroda» saıtyna jarııalaýdy uıymdastyrǵanyn estip, ákemizdiń jeke derekterin terdik. Sol kezde 1943 jyldyń 3 qyrkúıegindegi KSRO Joǵarǵy Keńesiniń qupııa buıryǵy shyǵa keldi.

Sarǵaıǵan, kitapqa tigilgen izderi bar bir paraq qaǵazdaǵy tizimde ákemizdiń aty-jóni, al endigi paraqta nagrada qaǵazy, ákemizdiń qandaı erligi úshin II dárejeli Uly Otan soǵysy ordenimen marapattalǵany aıtylǵan. Marapat paraǵyn toltyrǵan gvardııa maıory, 1-batalon komandıri Mýrzın qol qoıǵan. Marapat paraǵynda jaýdyń tankteri bizdiń jaýyngerlerdiń shabýylyn toıtaryp, toqtatyp turǵan kezde leıtenant Qojahmetov tankke eńbektep, jaqyndap baryp, granatamen dál uryp, jaý tankisin órtep, ózi aýyr jaraqat alyp gospıtalǵa jiberilgeni jazylǵan. Osy erligi úshin II dárejeli Uly Otan soǵysy ordenine usynylǵan.

Osy derekterdi oqyǵannan keıingi keý­deni kernegen ókinish, saǵynysh, maqtanysh sezimderin aıtyp jetkizý qıyn edi. Árıne, óki­nish sezimi basymdaý boldy. Qaıran áke, ózińiz barda osyny bilseńiz qandaı mar­qaıyp qalýshy edińiz...»

«Egemen Qazaqstan» gazeti, 2015 jylǵy 17 naýryz