Uly Jeńis kúniniń mán-maǵynasyn jastarǵa barynsha túsindirip otyrý kerek - UOS ardageri Mysaly Mahambetov

ASTANA. QazAqparat - Uly Jeńis kúniniń mán-maǵynasyn jastarǵa barynsha túsindirip otyrý kerek. Búgin elordadaǵy «Otan qorǵaýshylar» monýmenti alańynda ótken merekelik shara barysynda Uly Otan soǵysynyń ardageri Mysaly Mahambetov osyndaı pikirin bildirdi.

«Uly Jeńistiń 69 jyldyǵy barshamyzǵa qutty bolsyn! Osy meıram jalǵasa bersin, halqymyz ben Elbasymyz aman bolsyn! Zulmat soǵysty kórgen bizdiń býyn elimizdiń kók aspanynda árqashan da beıbitshilik bolýy úshin kóptegen qıyndyqtardy bastan keshirdi. Endigi bolashaq urpaq esh ýaqytta bundaı soǵysty kórmesin, jastarymyz aldaǵy ýaqytta da elimizdiń múddesi úshin qyzmet etsin», - dedi qart maıdanger.

Jambyl oblysy jerinen 1943 jyly soǵysqa attanǵan Mysaly ataı Lenıngrad maıdanyna qatysqan. Soǵys jyldarynda talaı qıyndyqtardy bastan keshirgen ardager barlaýshy mindetin atqardy. Sonymen qatar ol sarbazdardyń shabýyly aldynda nemis fashısteriniń mınalarynan tazartý jumystaryna at salysqan.