ULY OTAN SOǴYSYNYŃ BATYRLARY: Mahmet Qaıyrbaev
Mahmet Qaıyrbaev 1925 jyly qańtardyń 1-i kúni Shyǵys Qazaqstan oblysy Besqaraǵaı aýdany Semııarka selosynda dúnıe esigin ashyp, 1996 jyly Pavlodar qalasynda ómirden ótken. Ekinshi dúnıejúzilik soǵysqa qatysýshy, aǵa leıtenant, artıllerııa komandıri.
Qazaq balasy mektepten keıin Pavlodar pedagogıkalyq ýchılışesin bitirdi. Soǵys bastalǵanǵa deıin Semııarka selosyndaǵy mektepte muǵalim boldy. Keńes áskeri qataryna 1942 jyly tamyzda shaqyrylyp, artıllerııa ýchılışesine jiberildi. Uly Otan soǵysyna 1943 jyldan bastap qatysty. 17-shi tankige qarsy atatyn artıllerııalyq jeke brıgadanyń quramynda bolǵan.
Qaıyrbaev 18 jasynda Aleksandr Nevskıı ordeniniń ıegeri atandy. 1944 jyldyń 19 tamyzynda Lıtvadaǵy Shıaýlıaı qalasynyń batys jaǵynda bolǵan urysta jaý áskeri tankimen shabýylǵa shyǵyp, Keńes áskeri qorǵanysyn buza jaryp, Shıaýlıaı qalasyna kirýge umtyldy. Qaıyrbaev óziniń 15 jaýyngerimen qorshaýda qalyp, shaıqasyp jatqan polk batareıalarynyń birine kómekke keldi. Qaıyrbaevtyń basshylyǵymen jaýyngerler jaýdyń 7 shabýylyna toıtarys berip, bir batalon áskerin joıdy. Keskilesken osy shaıqasta erjúrek Qaıyrbaev bastaǵan jaýyngerler Shıaýlıaı qalasyna óter joldy japty. Qaıyrbaevqa kórsetken erligi men tapqyrlyǵy úshin KSRO Joǵarǵy Keńesi Tóralqasynyń Jarlyǵymen Keńes Odaǵynyń Batyry ataǵy berildi (24.3.1945).
Soǵystan keıin ol Pavlodar oblysynda partııa qyzmetinde boldy. Tyń jerlerdi ıgerýdegi eńbegi úshin eki ret Qyzyl Tý ordenimen jáne medaldarmen marapattaldy.
