ULY OTAN SOǴYSYNYŃ BATYRLARY: Ivan Panfılov
I.V. Panfılov birinshi dúnıejúzilik soǵysqa, 1918 - 20 jyly Azamat soǵysyna qatysyp, 25-atqyshtar dıvızııasynda vzvod, rota komandıri boldy. 1923 Kıevtegi joǵary áskerı mektepti bitirdi, batalon, polk basqardy.1937 jyly Orta Azııa áskerı okrýgy shtabynyń bólim bastyǵy,1938 jyly Qyrǵyz KSR-iniń áskerı komıssary boldy.1941 jyly soǵys bastalǵannan keıin Almaty qalasynda jergilikti ult ókilderinen 316-atqyshtar dıvızııasyn jasaqtap, Máskeýdi qorǵaýǵa jiberildi. 1941 jyldyń qazan-qarasha aılarynda Máskeý túbindegi qorǵanys kezinde Panfılov basqarǵan 316-atqyshtar dıvızııasynyń jaýyngerleri Volokolamsk baǵytyn qorǵaýda asqan erlik kórsetti. Máskeýdi qorǵaǵan jıyrma segiz gvardııashy panfılovshylardyń erlik dańqy shyqty. Panfılovshy batyrlar tobynyń erligi Keńes áskeri jaýyngerleriniń jappaı erlik kórsetýiniń úlgisi boldy. 17 qarashada 316-atqyshtar dıvızııasy Segizinshi gvardııalyq atqyshtar dıvızııasy bolyp atalyp, Qyzyl Tý ordenimen marapattaldy. 1941 19 qarashada jyly Máskeý túbindegi shaıqasta Panfılov qaza tapqannan keıin dıvızııa onyń esimimen ataldy. 1942 jyly 12 sáýirde oǵan Keńes Odaǵynyń Batyry ataǵy berildi. Lenın, 2 ret Qyzyl Tý ordenderimen jáne medaldarmen marapattalǵan. Panfılov Máskeýdegi Novodevıche zıratyna jerlengen.
Almaty oblysynda aýdan Panfılovtyń esimimen atalady. Almatyda onyń atynda bir kóshe, 28-gvardııashy-panfılovshylar atyndaǵy park bar, onda batyr-generalǵa eskertkish ornatylǵan.
