ULY OTAN SOǴYSYNYŃ BATYRLARY: Eleýisov Jánibek
Jánibek Aqatuly Eleýisov 1925 jyly Altaı ólkesi, Taýly-Altaı avtonomııalyq oblysy, Ýst-Kan aýdanyndaǵy Turata aýylynda týǵan.
2-dúnıejúzilik soǵysqa qatysýshy, qatardaǵy jaýynger, pýlemetshiler bólimshesiniń komandıri. Qazaqstanda 1942 jyly mektepti bitirgen. Mergenderdiń 6 aılyq kýrsyn bitirgen soń 1943 jyly shildede Eleýisov 6-gvardııalyq atqyshtar dıvızııasynyń 25-gvardııalyq atqyshtar polki quramynda Voronej maıdanynda urystarǵa qatysty. Alǵashqy urystyń ózinde pýlemetshiler bólimshesi jaýdyń 40-qa jýyq áskerin joıyp, 95 áskerin tutqynǵa aldy. Eleýisov jaýdyń 5 áskerin joıdy. Ol Desna, Dnepr jáne Prıpıat ózenderinen ótýdegi joıqyn urystarda erekshe kózge tústi. Eleýisov alǵashqylardyń biri bolyp platsdarmdy qutqarýǵa jaǵdaı jasady. Erlikteri úshin 16 qazan 1943 jyldary Eleýisovke KSRO Joǵarǵy Keńesi Tóralqasynyń Jarlyǵymen Keńes Odaǵynyń Batyry ataǵy berildi. Eleýisov Jánibek 1946 jyly zapasqa shyqty. Soǵystan keıingi jyldarda Jánibek Eleýisov uzaq ýaqyt Shemonaıha aýdanynda turdy, keıin Atyraý qalasyna kóshti. Atyraý oblysy DOSAAF (Armııa, avıatsııa jáne flotqa kómek kórsetýdiń erikti qoǵamy) komıtetinde sporttyq-atqyshtar klýbynyń basshysy boldy. Chernyı Anýı aýlynyń ortasynda batyrǵa qoıylǵan eskertkish bar.
