Uly Otan soǵysynyń ardagerlerine arnalǵan tilekterdi «dalalyq poshta» arqyly joldaýǵa bolady (FOTO)
Shara aıasynda M.Ótemisov atyndaǵy Oqýshylar saraıynda «Ardagerge hat» atty «dalalyq poshta» jumysy jańdanbaq. Ol arqyly qala turǵyndary men oqýshylar ardagerlerge óz tilekteri men jyly lebizderin jazyp joldaı alady. «Dalalyq poshtanyń» basynda kezekshiler bolady, sol jerden barshamen birge hatty rásimdep, boıap nemese úlken merekelik hatty qurastyryp, qan maıdanda ot keshken ardagerlerge jiberýge múmkindik týady.
Sonymen qatar qalanyń bilim basqarmasynyń bastamasymen mektepterde balalardyń maıdandyq brıgadalary quryldy. Osylaısha, maıdandyq brıgadalar «tımýrshylardyń» izin qýyp, ardagerlerge kómek kórsetetin bolady. Sondaı-aq «dalalyq poshtadan» túsken hattardy arnaıy shaǵyn avtobýspen ardagerlerge jetkizip berip otyrady. Ardagerlermen kezdesýden túsken fotosýretter arnaıy fotoreportajdarǵa toptastyrylyp, shara qorytyndysy boıynsha Oqýshylar saraıynyń ishinde ótetin kórmege qoıylady.
Mektep qabyrǵasynan tys sporttyq jarystar, mýzykalyq baıqaýlar jáne kórkemsýret óneriniń týyndylary qoıylǵan kórmeler, semınarlar men sabaqtar, áskerı oıyndar uıymdastyrylady. Jyl boıyna balalardyń ardagerlerge arnaǵan kontsertteri udaıy ótip turady. Soǵysta ot keshken qarııalar men búgingi jas urpaqtyń «Estelik shyraǵy» jáne «Tarıhtyń tiri daýystary» atty kezdesýleri josparlanǵan.
