Uly Otan soǵysynda «Mars» qupııa operatsııasyna qatysýshy qazaqstandyqtarǵa eskertkish ornatylsa ıgi - R. Halmuradov
ASTANA. Jeltoqsannyń 23-i. QazAqparat /Qanat Mámetqazyuly/ - Uly Otan soǵysynda «Mars» qupııa operatsııasyna qatysýshy qazaqstandyqtarǵa eskertkish ornatylsa ıgi.
Búgin QR Parlamenti Májilisiniń jalpy otyrysynda Úkimet basshysynyń atyna joldanǵan saýalynda depýtat Rozaqul Halmuradov osylaı málim etti, dep habarlaıdy QazAqparat.
«Uly Otan soǵysy kezinde qazaqstandyqtardan qurylǵan 100-shi, 101-shi jeke atqyshtar brıgadasy 1942 jyly keńes áskeriniń «Mars» kodymen atalatyn qupııa operatsııasyna qatysqan. Ókinishke qaraı, bul qupııa operatsııa sátsiz aıaqtalyp, buǵan qatysqan jaýyngerlerdiń 75 paıyzy qaza bolǵany belgili. Bulardyń ishinde 2 myńǵa tarta qazaqstandyq jaýyngerler de boldy», dedi depýtat.
Onyń aıtýynsha, 2005 jylǵa deıin bul operatsııa qupııa bolyp kelse, sol jyly reseılikterdiń UOS-na qatysty izdestirý sharalarynyń nátıjesinde, operatsııa týraly biraz shyndyqtar ashylǵan. Al atalǵan izdestirý jumystaryna Jambyl oblysyndaǵy «Temirqazyq» atty jastar qozǵalysy da atsalysypty.
«Bundaı izdeý jumystary jalǵasyn tabýy kerek. Sonymen birge, «Mars» jasyryn operatsııasyna qatysýshy qazaqstandyqtardy máńgi este saqtaý maqsatynda arnaıy eskertkish ashylsa ıgi. Buǵan Úkimetten qarjy bólse eken», dedi R. Halmuradov.
