Uly Otan soǵysy ardagerleri men múgedekteri poıyzdarda tegin júre alady

ASTANA. QazAqparat - «Qazaqstan Temir Joly» UK» AQ Jeńistiń 69 jyldyq mereıtoıyna oraı 2014 jyldyń 1 mamyrynan 31 jeltoqsanyna deıin Uly Otan soǵysynyń ardagerleri men múgedekterine jolaýshylar poıyzdarynda tegin jol júrý dástúrli aktsııasyn ótkizýde, dep habarlaıdy «Jolaýshylar tasymaly» AQ baspasóz qyzmetinen.

Merekelik aktsııa aıasynda UOS ardagerleri men múgedekteri Qazaqstan Respýblıkasy men TMD elderi aýmaǵynda temirjol kólikterinde tegin júre alady. Ardagerler «Talgo» zaýytynan shyǵarylǵan vagondardan quralǵan poıyzdardan bólek, jolaýshylar poıyzdarynyń barlyq sanattary men baǵyttarynda, sonymen qatar qalaaralyq poıyzdarda da kýpelik vagondarmen tegin júrý múmkindigine ıe.

Ardagerler tegin bıletti temirjol kassalarynan ala alady. Onyń ózimen birge jeke kýáligi, sonymen qatar, UOS ardageri nemese múgedegi ekendigi týraly kýáliginiń túpnusqasy men kóshirmesi bolýy qajet.

Aıta keteıik, aktsııany ótkizý týraly qajetti aqparatty «Jolaýshylar tasymaly» AQ-nyń temirjol kassalary men táýlik boıy jumys isteıtin «105» anyqtama telefony arqyly alýǵa bolady.