Uly qundylyqtarymyzdy álemge tanytýǵa tıispiz - aqyn

KÓKShETAÝ. QazAqparat - Elbasymyz Nursultan Ábishuly Nazarbaevtyń «Uly dalanyń jeti qyry» atty taǵylymdyq maqalasy árbir ultjandy qazaqtyń keýdesinde maqtanysh sezimin uıalatyp, rýhyn asqaqtata túseri anyq. Bul týraly pikirdi Qazaqstan Jazýshylar odaǵynyń múshesi, aqyn Qudaıberli Myrzabek bildirdi, dep habarlaıdy QazAqparat.

«Bul buǵan deıingi júzege asyrylyp jatqan «Bolashaqqa baǵdar: rýhanı jańǵyrý» baǵdarlamalyq maqalasyn mazmundyq jaǵynan baıytyp, aýqymyn keńeıtýge zor yqpal etpek. Maqaladaǵy baǵdarly jeti taqyryp ataýlarynyń ózinen-aq ár oqyrmannyń sana bıiginde uly dalanyń jeti keremeti degen aıshyqty oı da jeti juldyzdaı jana ketedi desem artyq aıtqan bolmaspyn. Biz buryn kim edik, bolashaqta qandaı bolýymyz kerek degen suraqqa tolyq jaýap bolarlyq negiz bar bul maqalada. Elbasymyz óziniń el basqarýdaǵy danalyǵyn taǵy bir jarqyn bıikke kóterdi. Batystyń mıftik jadynda kentavr beınesinde jattalǵan babalarymyzdyń jylqynyń jalynda tanylǵan batyrlyq turpaty  táýelsizdigimizdiń arqasynda álemdik deńgeıde dáripteletin múmkinshilikke qol jetkizbek», - deıdi Qudaıberli Myrzabek.

Onyń aıtýyna qaraǵanda, ejelgi órkenıettiń jetistigi sanalatyn temirdiń syryn tapqan da, altynmen aptalǵan saltanatty mádenıettimen adamzatty tańqaldyrǵan da, túrki áleminiń besigi bolǵan, Uly jibek joly arqyly batys pen shyǵysty jalǵastyrǵan, alma men qyzǵaldaqtyń otany Qazaqstan ekenin urpaqqa ulyǵat etken Elbasymyz  kók týdyń qudireti men qasıetin uqtyrdy.

«Bul maqalany árkim oqyp shyǵýy kerek. Biz osyndaı tarıhy bar, osyndaı amanaty bar halyqpyz. Ózimizdi ózimiz tanyp bilip, dúnıejúzine uly qundylyqtarymyzdy tanytýǵa tıispiz. Uly dalanyń Elbasy ataǵan jeti qyryn zerttep, zerdeleý arqyly qazaq tiliniń sheksiz baılyǵynyń qaıdan shyqqanyna da kóz jetkizemiz. Óz basym maqalany oqyp shyǵyp qanattanyp, qýanyp otyrmyn», - deıdi ol.