Ýly gazdy anyqtaıtyn datchıkter 140 adamdy ólimnen qutqardy – TJM
«Jylytý maýsymy bastalǵaly órt sanynyń 20%-ǵa jáne adamdardyń órtten qaza bolýy 32,5% tómendeýi baıqalady. Sońǵy 2 jylda atqarylǵan júıeli jumystar úılerdegi, ásirese halyqtyń áleýmettik osal toptaryndaǵy órtter sanynyń aıtarlyqtaı tómendegenin kórsetti», - dedi N. Derbisov Ortalyq kommýnıkatsııalar qyzmetinde ótken baspasóz máslıhatynda.
Spıkerdiń aıtýynsha, 2020-2021 jyldardyń ótken jylytý kezeńinde atalǵan sanattaǵy úılerde 19 órt bolsa, bıylǵy jylytý kezeńinde Nur-Sultan qalasynda bir órt tirkeldi.
«Jeke turǵyn úılerde ýly gaz datchıkterin ornatý jalǵasýda, búgingi kúni respýblıka boıynsha jeke úılerde 14 594 datchık ornatyldy, onyń ishinde tabıǵı gaz – 7 756, ýly gaz – 6 703 jáne tútin datchıkteriniń sany – 135. Sońǵy 3 jylda ákimdikter men demeýshiler esebinen 135 myńnan astam avtonomdy datchıkter ornatyldy. Osy jumystyń tikeleı nátıjesi – ótken jylytý kezeńderinde 140 azamattyń ómiri men densaýlyǵyn qutqarǵan 36 datchıktiń iske qosylýy boldy», - dep túsindirdi komıtet tóraǵasy.
Mysaly, 2020-2021 jyldary jylytý kezeńinde 4 jaǵdaıda úı-jaıdaǵy ýly gazdy anyqtaıtyn datchık iske qosylyp, sonyń arqasynda 15 adam qatty ýlaný men ólimnen aman qaldy.
«Qabyldanǵan sharalar men oń dınamıkaǵa qaramastan, turǵyn úı sektorynda ýly gazben ýlaný áli de tirkeledi. Qazirgi ýaqytta ýly gazben ýlanýdan qaza 1 bolyp, 11 adam jaraqat aldy. Jylytý maýsymy bastalǵaly ýly gazdan qaza tapqandardyń 4 esege, jaraqattanǵandardyń 60%-ǵa tómendegeni baıqalady», - dedi Nurbolat Derbisov.
Buǵan deıin spıker jyl basynan beri Qazaqstanda 9 myńnan astam órt bolyp, 300-ge jýyq adam qaza tapqanyn baıandaǵan edi.
