Ýly gaz datchıginiń arqasynda 29 adamnyń ómiri aman qaldy – TJM

NUR-SULTAN. QazAqparat – Bıyl elimizde jylytý maýsymy bastalǵaly ýly gaz datchıgi der kezinde dabyl qaǵyp 29 adamnyń ómirin saqtap qaldy. Bul týraly QR Tótenshe jaǵdaılar mınıstrligi órtke qarsy qyzmet komıtetiniń tóraǵasy Nurbolat Derbisov málim etti, dep habarlaıdy QazAqparat tilshisi.

«Bıyl 1 maýsym men 19 qarasha aralyǵynda respýblıka boıynsha jeke turǵyn úılerge 16 490 datchık ornatyldy. Onyń ishinde 7 758 dana tabıǵı gaz datchıgi, 8 284 ýly gaz jáne 448 dana tútin datchıgi bar. Sondaı-aq, bıyl jylytý maýsymy bastalǵaly ýly gazdyń taralý 3 jaǵdaıy tirkeldi, qýanyshqa oraı datchık ýaqytyly iske qosyldy. Sonyń arqasynda 29 adamnyń ómiri ýly gaz qaýpinen aman qaldy», - dedi Nurbolat Derbisov OKQ-de ótken baspasóz máslıhatynda.

Onyń aıtýynsha, 2019 jyldan bastap respýblıka boıynsha 137 002 datchık ornatylǵan.

«Osy jumystyń nátıjesinde ótken jylý berý maýsymynda 39 dabyl datchıgi ýaqytyly iske qosylyp 100 azamattyń ómirin qutqaryp qaldy», - deıdi ol.

Sondaı-aq, komıtet basshysy órttiń aldyn alý sharasyna qatysty BAQ-ta aqparattardyń jıi taratylatynyn aıtty.

Atap aıtqanda, teledıdar boıynsha 650 habar, baspasóz betterinde – 2 425 jáne radıo arqyly tilsiz jaýdan saqtaný týraly 3 777 habar taratylǵan.

Odan bólek, TJM resmı saıty men áleýmettik jelilerde 8 748 órt qaýipsizdigi týraly aqparat ornalastyrylǵan.