Uly dala joryǵynda Aqmola oblysynyń namysyn qyzdar qorǵaıdy
ASTANA. QazAqparat – Búgin elordada «Uly dala joryǵy» ІІ marafon báıgesi bastaldy. Jarysqa 19 komanda qatysyp jatyr, sonyń ishinde Aqmola oblysy atynan qatysqan qyzdar quramasy kópshiliktiń nazaryn aýdardy, dep habarlaıdy QazAqparat tilshisi.
Attar báıgesine el óńirlerinen 19 komanda qatysyp jatyr. Ereksheligi sol - Aqmola oblysynyń namysyn qyzdar qorǵaıdy, qalǵan komandalardyń quramynda tek er adamdar.
Aqmolalyq názik jandardan «Er adamdarmen birge at jarysta baq synaý qıynǵa soqpaı ma?» dep suraǵan edik.
«Bıyldyqqa birinshi ret jarysqa shyǵyp otyrmyz. Jalpy 5-6 jyldan beri túrli at jarystaryna qatysyp kelemiz. Qyzdarǵa arnalmaǵan sport túri degen – stereotıp. At sporty erler nemese qyzdar dep bólinbeıdi. Múmkindik teń. Onyń ústine, jeńiske jetý tek shabandozǵa baılanysty emes, attyń daıyndyǵy óte mańyzdy. Bizdiń komandada 5 adam, onyń 4-eýi - qyz, 1 er adam», - dedi komanda múshesi Laýra Pýhbabaı.
Buǵan deıin «Uly dala joryǵy» bastalyp, shabandozdar Astanadan Túrkistanǵa jol tartqanyn habarlaǵan edik.
At jarysy elorda irgesindegi Qarajar aýylynan bastaldy. Shabandozdar 1 300 shaqyrymdy baǵyndyryp, 19 qyrkúıekte Túrkistanda márege jetedi.
«Uly dala joryǵy» marafonynyń jalpy júlde qory - 65 mln teńge. Jeńimpaz komandaǵa 30 mln teńge, 2-orynǵa 20 mln teńge, al 3-orynǵa 15 mln teńge tabystalady.
