Uly dala joryǵy: Úzdikter anyqtaldy
TÚRKІSTAN.QazAqparat- Astanadan bastaý alǵan «Uly dala joryǵy» respýblıkalyq marafony Túrkistan qalasynda qorytyndylandy, dep habarlaıdy QazAqparat tilshisi.
Elimizde alǵash ret uıymdastyrylǵan «Uly dala joryǵy» marafon-báıgesi márege jetti. 12 kún buryn Astana qalasynda bastaý alǵan alaman barysynda shabandozdar 1200 shaqyrymdy baǵyndyrdy. Saıystyń sońǵy kúninde 4 komanda ǵana jarys jolyn jalǵastyryp Túrkistanǵa jetti. Olar – Túrkistan, Mańǵystaý, Jetisý jáne Jambyl oblystarynyń shabandozdary.
Ulttyq sportty ulyqtaǵan marafonǵa qatysýshylardy jankúıerler qaýymy ystyq yqylaspen qarsy aldy.
Shabandozdarǵa Túrkistan óńirindegi at sportynyń jankúıerleri qoldaý kórsetip, árbirine alǵystaryn bildirdi.
«Uly dala joryǵy» marafon báıgesin uıymdastyrýshylarynyń biri Arman Abdollaevtyń aıtýynsha, bul báıgede qazaq jylqylarynyń mártebesi asqaqtaı túsken.
«Bıyl tuńǵysh ret ótip otyrǵan bul báıgeniń balamasy álemde joq deýge bolady. Jarysty uıymdastyrar barysynda biz jan-jaqty zerttep kórdik. 1200 shaqyrymdy ári birneshe óńirdi qamtıtyn kóshpeli báıge álemde joq. Taǵy bir aıta keterligi, osy báıgeni qadaǵalap, zerttep júrgen mamandar qazaq tulparlarynyń shydamdylyǵyna tańǵalyp otyr. Bizdiń maqsat ta – ulttyq sportty ulyqtaý, qazaqty at sportyna qyzyqtyrý ári uly dalamyzdyń tulparlaryn dáripteý. Birneshe oblysty basyp ótip, úlken qıyndyqtardy jeńe bilgen árbir shabandoz qurmetke laıyq. Túrkistan oblysy turǵyndaryna alǵysymyz mol. Sozaq dalasynda qoshemetpen qarsy alyp, shabandozdarǵa jiger berdi. Osy marafonda eń kóp jankúıer Túrkistan oblysynda jınaldy. Bul – óńirde ulttyq sport janashyrlarynyń kóptiginiń belgisi», – dedi ol.
Marafonǵa qatysýshylarǵa túrkilerdiń kıeli jerleri – Joshy han, Alasha han keseneleri, sondaı-aq Qazaq handyǵynyń alǵashqy astanasy Sozaq qalasy pen túrki rýhanııatynyń besigi Túrkistan qalasy sııaqty tarıhı oryndarǵa, Áziret-Sultan kesenesine zııarat jasady.
Jeńimpazdardy marapattaý Túrkistan tórinde jalǵasty.
Saltanatty sharada sóz alǵan QR Mádenıet jáne sport mınıstri Dáýren Abaev úzdikter men jankúıerlerdi quttyqtap, is sharanyń mańyzdylyǵyna toqtalyp ótti.
«AMANAT» partııasynyń Atqarýshy hatshysy Ashat Oralov dala dástúri men uly kóshpendiler mádenıeti qaıta jańǵyrǵanyna toqtalsa, Túrkistan oblysynyń ákimi Darhan Satybaldy teńdissiz joba qazaq rýhanııaty men sportyn joǵary deńgeıge kótergenin jetkizdi. «The Great Steppe tour» qoǵamdyq qorynyń tóraǵasy Álibek Áldeneı marafondy halyqaralyq deńgeıde ótkizý kerektigin aıtty.
12 kúnge sozylǵan «Uly dala joryǵy» respýblıkalyq marafonynyń nátıjesinde birinshi oryn ıegeri atanǵan Mańǵystaý óńiriniń «Kókmaınaq» komandasyna Dáýren Abaev pen Ashat Oralov sertıfıkat pen medaldi tartý etti. Báıgeniń jeńimpazdaryna 24 mln. teńge kóleminde júlde tabystaldy.
Al, ekinshi oryndy Jetisý oblysynyń «Jetisý» komandasy jeńip alyp, 12 mln. teńgeni ıelendi.
At báıgesiniń qorytyndysyna sáıkes, úshinshi oryndy Túrkistan oblysynyń «Teriskeı» komandasy qol jetkizdi. Olar 9 mln. teńge syıaqyny qanjyǵalaryna baılady.
Tórtinshi orynnan kóringen jambyldyqtar da qarjylaı syılyqqa ıe boldy.
Іs-shara barysynda birshama shabandozdarǵa arnaıy marapat tabystaldy.
Alaman-báıgeniń jabylý saltanaty kontserttik baǵdarlamamen ulasty.
Aıta keteıik, QR Mádenıet jáne sport mınıstrligi jáne «The Great Steppe tour» qoǵamdyq qorynyń bastamasymen, «AMANAT» partııasynyń qoldaýymen 18-qyrkúıek kúni Astana qalasynda «Uly dala joryǵy» marafon-báıgesi bastalǵan bolatyn.
Іs sharanyń ashylý saltanatynda Májilis tóraǵasy Erlan Qoshanov Memleket basshysy Qasym-Jomart Toqaevtyń alamanshylardy quttyqtaý hatyn oqyp bergen edi.
Memleket basshysy Qasym-Jomart Toqaev Túrkistan oblysyna jasaǵan jumys saparynda jáne marafon-báıgeniń ashylý rásiminde joldaǵan quttyqtaý hatynda bul sharanyń mańyzdylyǵyna atap ótip, ulttyq sportty jańǵyrtý arqyly rýhanı serpilis ákelý basty maqsat ekenin jetkizgen bolatyn.
