Uly Dala joryǵy: Shymkent, Aqtóbe, Mańǵystaý shabandozdary aldyńǵy úshtikte keledi
Qazaqstanda alǵash ret respýblıkalyq «Uly Dala joryǵy» at sporty marafony ótip jatyr. Atalmysh sharaǵa Aqtóbe oblysynyń ókilderi belsendi at salysýda.
«Uly Dala joryǵy» - bul álemdik tájirıbede teńdesi joq jalpy respýblıkalyq at sporty marafony. Onda Astana qalasy, Aqmola, Qaraǵandy, Ulytaý, Qyzylorda, Túrkistan oblystary sekildi eldiń alty óńiri qamtylady.
Jobanyń maqsaty – Qazaqstanmen tikeleı baılanysy bar tanymal brend jasaý, ulttyq mádenıetti halyqaralyq arenaǵa shyǵarý, jastardy ulttyq mádenıet pen tarıhty zerdeleýge tartý, sporttyq sheberlik pen toleranttylyq qundylyqtaryna tárbıeleý. Marafon otandyq týrızm men ulttyq sportty damytýǵa serpin beredi dep kútilip otyr.
«Qazaqstannyń barlyq óńirinen júz shabandoz qatysyp jatqan marafon 17 qyrkúıekte Astanadaǵy «Qazanat» ıppodromynda saltanatty túrde ashyldy. Marafonshylar qyrkúıektiń 18-29 aralyǵynda elordadan Túrkistan qalasyna deıin 1200-den astam shaqyrymdy júrip ótedi.
Úshinshi kezeńniń qorytyndysy boıynsha shabandozdar 300 shaqyrymdyq mejeni eńserdi. Kóshbasshylar úshtiginde Mańǵystaý oblysynyń, Shymkent qalasy men Aqtóbe oblysynyń komandalary bar», - dep jazdy vedomstvodan.
Aqtóbe oblysynyń atynan Jasulan Elýbaev, Seıilǵazy Aımaǵambetov, Bekqalı Bolatbekov, Beıbarys Iteshov pen Álıhan Muhambetov qatysýda.
Aqtóbe oblystyq «Báıge» federatsııasynyń dırektory, Aqtóbe qurama komandasynyń basshysy Azat Júken at sportymen aınalysatyn qaýymnyń mundaı jarysty 20 jyl boıy kútkenin atap ótti.
«Ózim 10 jasymnan atqa minip kelemin. 2004 jyldan beri biz osyndaı 300-400 shaqyrymdyq saparlarǵa shyǵyp, tórt aýdandy araladyq. Biz osyndaı marafondardy armandadyq. Joba jaıynda bilgen boıda uzaq jolǵa shydamdy eń myqty, tózimdi attardy tańdap aldyq. Shabandozdar – 15 jyldan beri báıgelerge qatysyp, jeńimpaz atanyp júrgen jigitter. Marafonshylarymyzdy tek jeńis tuǵyrynan kóresizder», - dep ýáde berdi ol.
Uıymdastyrýshylar barlyǵyn usaq-túıekke deıin qarastyrǵan: marafonǵa qatysýshylar Uly dalanyń rýhyn sezinip, túrkilerdiń kıeli jerleri – Joshy han, Alash han kesenelerine zııarat etý múmkindigine ıe bolady. Sondaı-aq, Qazaq handyǵynyń tuńǵysh astanasy, túrki rýhanııatynyń besigi sanalatyn Sozaq qalasyna, Túrkistan qalasyna, Áziret-Sultan kesenesine soǵady.
Marafon-báıgeniń barlyq kezeńin eńsergen komanda Túrkistan qalasyna rekordtyq qysqa merzim ishinde jetip, «Uly Dala sarbazy» ataǵyn ıelenedi de 30 mln teńge kólemindegi bas júldeni, al ekinshi, úshinshi oryndardy ıelengen komandalar 20 mln teńge jáne 15 mln teńge kólemindegi syıaqyny alady.
Marafon baıqaýynyń uıymdastyrýshysy - «The Great Steppe Tour» qoǵamdyq qory men ulttyq sport qaýymdastyǵy.
