«Uly dala joryǵy» shabandozdary 1000 shaqyrymdyq mejeni baǵyndyrdy
TÚRKІSTAN. QazAqparat- Búgin - «Uly Dala Joryǵy» marafon-báıgesiniń 10-shy kúni. Shabandozdar jalpy 1000 shaqyrymdyq mejeni baǵyndyrdy, dep habarlaıdy QazAqparat tilshisi.
Shabandozdar Sozaq aýdany, Qarataý aýyl okrýgi, Saryjaz eldi mekenine at basyn tiredi. Endi at aıaǵyn sýytyp, tańerteń qaıta jolǵa shyǵady. Búgingi jarysta alǵash bolyp márege Túrkistan oblysynyń shabandozdary jetti. Aqtóbe oblysy men Mańǵystaý oblysy ekinshi, úshinshi bolyp máre syzyǵyn qıdy. Tórtinshi bolyp Qyzylorda oblysy keldi. Qalǵan 4 komandar jarys jolynda.
Túrkistan oblysy komandasynyń jetekshisi Almat Aıtjan dúbirli dodanyń mańyzy, saıystaǵy nátıjeleri týraly aıtyp ótti.
«Elordamyz Astanadan bastaý alǵan marafon-báıgeniń sońyna da taıap qaldyq. Tulparlar týǵan jerdiń topyraǵyna aıaq artqan soń jyldamdyǵyn da údetip keledi. Keshe marafon-báıgeniń 9-shy kúni 1-shi keldik. Mine, búgingi jarys kúni de alǵash bolyp máre syzyǵyn qıdyq. Jalpy esepte komandalyq jaǵdaıymyzdy jaqsaryp keledi. Bul jerdiń saı-qyry, atqa da shabandozǵa da tanys. Sondyqtan nátıje de artyp keledi», - deıdi atbegi.
Jarystyń belsendi kórermeni, Qarataý aýyl okrýginiń turǵyny Elmurat Kerimhan túrkistandyq shabandozdarǵa sáttilik tilep, izgi lebizin bildirdi.
«Marafon-báıge bastaldy degeli eki kózimiz tórt bolyp, shabandozdardy kútip júrmiz. Jerlesterimizge jankúıerlik etip, solardyń tileýin tilep otyrmyz. Keshe de Taıqońyr eldi mekeninde olardy kútip alǵanbyz. Búgin de arnaıy keldik», - deıdi sport janashyry.
Aıta ketsek, jarys jolyndaǵy 8 komanda búgin osynda tynyǵady. Erteń Sholaqqoran aýyl okrýgi, Abaı eldi mekenine qaraı 100 shaqyrymdyq jarys jolyna shyǵady.
