Uly dala joryǵy: Shabandozdar Astanadan Túrkistanǵa jol tartty
ASTANA. QazAqparat – «Uly dala joryǵy» respýblıkalyq marafon báıgesi búgin elordadan bastaldy, dep habarlaıdy QazAqparat tilshisi.
Bıyl ekinshi ret uıymdastyrylǵan báıgege el óńirlerinen 19 komanda qatysyp jatyr. At jarysy elorda irgesindegi Qarajar aýylynan bastaldy. Shabandozdar 1 300 shaqyrym qashyqtyqta jarysady, 19 qyrkúıekte Túrkistanda márege jetedi.
«Joryq 14 kezeńnen turady. Birinshi kezeń - 50 shaqyrym. Odan keıin 12 kezeńde 100 shaqyrymdy júrip ótedi. Sońǵy 14-kezeńde 50 shaqyrym joldy baǵyndyryp, Túrkistanda márege jetedi. Atyraý oblysynan basqa barlyq óńirden komandalar qatysyp jatyr, barlyǵy marafonǵa saqadaı saı. Keshe attar veterınarııalyq tekserýden ótti», - dedi atalǵan sharany uıymdastyrýshy Ǵanı Dúıshenov.
«Uly dala joryǵy» marafonynyń jalpy júlde qory - 65 mln teńge. Jeńimpaz komandaǵa 30 mln teńge, 2-orynǵa 20 mln teńge, al 3-orynǵa 15 mln teńge tabystalady.
Joryq barysyn 2 halyqaralyq jáne 2 qazaqstandyq sýdıa baǵalaıdy, al jol boıy attardyń jaǵdaıyn 2 halyqaralyq jáne 3 qazaqstandyq mal dárigeri qadaǵalaıdy.
Aıta keteıik, «Uly dala joryǵy» báıgesi respýblıkalyq «JORYQ» at sporty federatsııasynyń, Mádenıet jáne sport mınıstrliginiń «Amanat» partııasynyń jáne Ulttyq sport túrleri qaýymdastyǵynyń qoldaýymen ótip jatyr.
