«Uly dala jastary» jobasy iske qosyldy

ASTANA. QazAqparat - «Rýhanı jańǵyrý» baǵdarlamasy aıasynda joǵary oqý oryndarynda «Uly dala jastary» jobasy iske qosyldy. Ony «Rýhanı jańǵyrý» baǵdarlamasy basqarý ofısiniń menedjeri Bolat Atybaı Astana qalasynyń ákimdiginde ótken dóńgelek ústel májilisinde tanystyrdy, dep habarlaıdy Astana qalasy ákimdiginiń medıa ortalyǵy.

Májiliske Astana qalasynyń ishki saıasat, jastar saıasaty máseleleri basqarmalary qyzmetkerleri, baǵdarlamany basqarý ofısiniń menedjeri Atybaı Bolat jáne elordadaǵy 14 joǵarǵy oqý oryndarynyń ókilderi qatysty.

«Tárbıe jáne bilim» kishi baǵdarlamasy úsh baǵyttan turady. Sol úsh baǵyttyń biri - «Sanaly azamat». Osy «Sanaly azamat» baǵytynyń sheńberinde «Uly dala jastary» jobasy ázirlendi. «Rýhanı jańǵyrý» baǵdarlamasy aıasynda jasalyp jatqan jumystardan joǵary oqý oryndary shet qalǵan. Astana qalasyndaǵy JOO-dardy «Rýhanı jańǵyrý» baǵdarlamasyna qosý úshin osy joba jasaldy. Jobanyń maqsaty - elimiz alǵa qoıǵan mindetterdi jastardyń boıyna sińirý», - dedi Bolat Atybaı.

Jobanyń negizgi bastamasy - Qazaqstan Respýblıkasynyń Bilim jáne ǵylym mınıstrligi ekendigin aıta ótken jón. «Uly dala jastary» jobasy qazan aıynan bastap júzege asyryla bastady. Joba jastardyń belsendiligin arttyrýǵa, ıaǵnı, ǵylym, bıznespen aınalysýyna jaǵdaı jasaý, jańa bastamalar jasaý, ǵylymı jýrnaldardaǵy shet tilindegi maqalalardyń sanyn ulǵaıtýǵa áser etedi. Májilis barysynda oqý ornyn tamámdaǵan jastardyń jumyspen qamtylý deńgeıi tómen ekendigi jaıly, sonymen qosa jataqhana jetispeýshiligi máseleleri qyzý talqyǵa salyndy.

Jıyn qorytyndysy boıynsha JOO-lary atalǵan jobaǵa óz qyzyǵýshylyqtaryn bildirip, belsendi atsalysatyndyǵyn jetkizdi.