«Uly dala sazy» jobasy kórermenge jol tartady
Jańa jobanyń maqsaty - atadan balaǵa mura bolǵan dástúrli án, jyr-termeler men kúılerdi odan ári damytyp, óskeleń urpaqqa jetkizý.
17 kontsertten turatyn jańa mýzykalyq joba ulttyq arna efırinen 13 qańtardan bastap apta saıyn saǵat 21:05-de kórsetiledi. Uzaqtyǵy - 1 saǵat. Dástúrli óner sharasy ústimizdegi jyldyń tamyz aıyna deıin turaqty júrgiziledi.
«Elbasynyń «Uly dalanyń jeti qyry» maqalasynda ulttyq qundylyqtardy zamanaýı turǵyda dáripteý máselesi kóterildi. Bizdiń maqsatymyz - Elbasy maqalasyndaǵy kóterilgen ıdeıalardy júzege asyrý. Osy turǵyda ulttyq arna tól ónerdi jańasha nasıhattaý maqsatynda televızııalyq joba jasady. Ulttyq arna buǵan deıin de birneshe jobany júzege asyryp keledi. Al bul jobanyń maqsaty - dástúrli mýzykany ulyqtaýmen qatar, osy salada júrgen ónerpazdardyń basyn qosý. Kontsertte búginde umyt bolǵan halyq ánderi men qazaq kompozıtorlarynyń shyǵarmalary oryndalady», - dedi «Qazaqstan» teleradıokorporatsııasynyń basqarma tóraǵasy Erlan Qarın OKQ-de ótken baspasóz máslıhatynda.
Onyń aıtýynsha, jobada oryndalǵan shyǵarmalardyń barlyǵy ulttyq arnanyń altyn qoryna enedi.
«Uly dala sazy» jobasynyń túsirilimi ótken jyldyń qarasha aıynda bastalyp, onda 177 shyǵarma oryndaldy. Óner sharasyna barlyǵy 91 ónerpaz, onyń ishinde 16 termeshi, 34 kúıshi, 39 ánshi jáne 2 jyrshy qatysty.
Sondaı-aq, atalǵan jobaǵa Seken Turysbekov, Ramazan Stamǵazıev, Sáýle Janpeıisova jáne taǵy basqa elimizge tanymal dástúrli óner maıtalmandary qatysady.