«Uly dala oıyndaryna» qatysýshylar sany rekordtyq kórsetkishke jetti
ALMATY. QazAqparat - Almatyda ótip jatqan «Uly dala oıyndarynyń» júlde qory bıyl 24 mln teńgege jetti, al qatysýǵa 600 adam ótinish bildirdi, dedi búgin Almatyda ótken baspasóz máslıhatynda qalalyq Dene shynyqtyrý jáne sport basqarmasynyń basshysy Ábil Donbaev.
Aıta keteıik, Almatyda 13 mamyrdan bastap ulttyq sport túrlerinen «Uly dala oıyndary» respýblıkalyq festıvali ótip jatyr. Festıval 19 mamyr kúni máresine jetpek.
«Qazaqstannyń túkpir-túkpirinen kelgen sportshylar on eki ulttyq sport túrinen: taı jarys (4 km), qunan báıge (7 km), top báıge (13 km), tegis báıge, alaman báıge (21 km), kókpar, aýdaryspaq, teńge ilý, toǵyzqumalaq, asyq atý, jamby atý jáne qazaq kúresinen dodaǵa túsip jatyr. Festıval qalalyq ıppodromda saltanatty túrde máresine jetip, qorytyndylanady. «Sporttyq Almaty» baǵdarlamasy aıasynda ótip jatqan atalǵan respýblıkalyq festıval bıyl qatysýshylar jaǵynan rekord ornatyp otyr. Barlyq sport túrinen 600 adam ótinish bildirgen», - dedi Almaty qalasy Dene shynyqtyrý jáne sport basqarmasynyń basshysy Ábil Dońbaev.
Sonymen qatar, vedomsvto basshysy bıyl Qazaqstan tarıhynda tuńǵysh ret at jarysynan «Báıge» respýblıkalyq chempıonaty ótip jatqanyn aıtty.
«Almaty ıppodromyna osynshama qatysýshynyń ótinish bildirgenine qýanyshtymyz. Bizdiń ıppodrom halyqaralyq talaptarǵa saı keletinin bilemiz. Biz qazir sapany arttyra túsýge jumys jasap jatyrmyz», - degen Ábil Dońbaev «Uly dala oıyndarynyń» júlde qory 24 mln. teńgege jetkenin aıtty.
«Jeke kásipkerler men Ulttyq sport túrleri federatsııasynyń qoldaýymen júlde qory 24 mln. teńgege jetip otyr. Bul ulttyq sport oıyndarynyń abyroıyn asyryp, qatysýshylardyń qyzyǵyn arttyra túsedi», - dedi ol.
