Uly dala ósıeti
2015 jyldyń 2 shildesinde elordamyzdaǵy «Kórme» ortalyǵynda Memleket basshysy Nursultan Nazarbaevtyń qatysýymen «Nurly jol» jáne Údemeli ındýstrıaldyq-ınnovatsııalyq damý memlekettik baǵdarlamalarynyń iske asyrylýy barysyna arnalǵan jalpulttyq telekópirdiń ótkeni belgili. Jıyn sońynda is-sharany qorytyndylap, halyqpen oı bólisken Elbasy Qazaqstannyń beıresmı sımvoldyq ataýyn búkil álem boıynsha ilgeriletý týraly tyń mindet qoıyp, «Ádette, Japonııany - kúnshyǵys eli, Koreıany - tańǵy shyq eli, Nıderlandyny - qyzǵaldaqtardyń otany, Qytaıdy - aspan asty eli dep jatamyz. Qazaqstanǵa da osyndaı ataýly brend jetispeıdi. Biz - Uly dalanyń perzentterimiz. Bizdiń babalarymyz osy dalada ómir súrip, kókke tabynǵan. Táńiri degenimizdiń ózi - kók aspan. Bizdiń týymyzdyń kók tústi bolýynyń astarynda da osyndaı syr bar. Biregeı kók tús - elimizdiń birliginiń belgisi. Endeshe, bizge nege ózimizdi Uly dala elimiz dep atamasqa», - degen oıyn bildirgen edi.
Elbasynyń jurtqa oı tastaǵan osy sózderin negizge alǵan Ońtústik Qazaqstan oblysynyń ákimdigi Uly Dalanyń rýhanı baılyǵymen halyqty qaıta qaýyshtyryp, qoǵamdyq sanada sol uly muramyzdy jańǵyrtý maqsatynda «Uly dala ósıeti» jınaǵyn shyǵarýǵa muryndyq bolǵan edi. Igilikti is-sharany júzege asyrý úshin oblys ákimdiginiń basshylyǵymen óńirdegi tanymal ǵalymdardan, ádebıettanýshylar men tarıhshylardan turatyn shyǵarmashylyq top quryldy. Dana babalaramyzdyń sońyna ólsheýsiz mura retinde qaldyrǵan oı marjandaryn jáne qolyna qalam ustaǵan sóz zergerleriniń taǵylymdy oı túıinderin zerttegen shyǵarmashylyq toptyń jasaǵan jumysynyń arqasynda «Uly dala ósıeti» jınaǵy jaryq kórip, Qazaq handyǵynyń 550 jyldyq mereıtoıy qarsańynda halyqtyń rýhanı ıgiligine aınalyp otyr.
«Uly dala ósıeti» kitabynyń betashary retinde táýelsizdik týyn tigip, memleketimizdiń álemdegi damyǵan otyz elderdiń qatarynan tabylýy úshin eren eńbek atqaryp kele jatqan Qazaqstan Respýblıkasynyń Tuńǵysh prezıdenti Nursultan Nazarbaevtyń oı-tujyrymdary berildi.
Jınaq úsh bólimnen turady. «Oı túbinen shyqqan sóz..» dep atalatyn alǵashqy taraýda bizdiń dáýirimizge deıingi myńjyldyqtarda ómir súrgen Anharsısten bastap (Anaqarys), túrki dúnıesine ólsheýsiz úles qosqan - Tonykók, Bilge qaǵan, Kúltegin sııaqty, sondaı-aq, irgeli memleket qurǵan oıshyl da qolbasshy tulǵalardyń tasqa bádizdelip, bizge jetken ǵajaıyp oılary saraptalyp, bir izge túsirildi. «Qara qyldy qaq jarǵan» taraýynan qazaqtyń bı-sheshenderi, aqyn-jyraýlarynyń el bolý ıdeıasy, atameken, erlik pen ımandylyq tóńiregindegi qundy oı-pikirlerin oqı alasyzdar. «Qumnan altyn súzgendeı» dep atalatyn sońǵy bólimde eldiń egemendigin ańsap, janyn pıda etken Alash ardaqtylary men táýelsizdik ıdeıasyn ultymyzdyń sanasyna synalap sińirgen sóz zergerleriniń oı-tolǵamdary kórinis tapty.
Qandaı zamanda da halqymyz dala danyshpandarynyń sóz ónerin joǵary baǵalap, «atadan -ósıet, anadan-qasıet» dep ony ómiriniń negizgi baǵdarshamyna aınaldyrǵan. Jón sózge toqtaǵan, ataly sózge qulaq asqan, ómir túıtkilderiniń bárin de keńesip otyryp ortaq mámilege, bir sheshimge kelgen.
«Uly dala ósıeti» jınaǵy sol uly dástúrdiń jalǵasyn tabýyna septigin tıgizip, uly babalaramyzdyń danalyq oı ushqyndary jas urpaqtyń rýhyn kemeldendirip, olardyń boıyna máńgilik rýhanı azyq bolaryna senimimiz kámil.
