«Uly dala hıkaıalary»: Tarazda erekshe sýret kórmesi ashyldy
TARAZ. QazAqparat - Tarazda tuńǵysh ret «Uly dala hıkaıalary» atty sýret kórmesi ashyldy. Qazaqstannyń zamanaýı óner týyndylaryn pash etý maqsatynda uıymdastyrylǵan sharaǵa elimizdiń beldi qylqalam sheberleriniń sýretteri qoıylyp, kórermenderge usynyldy, dep habarlaıdy QazAqparat.
Oblystyq qazaq drama teatrynyń foesinde jasaqtalǵan erekshe kórmede dástúrli tehnıkalarmen oryndalǵan músin, keskindeme, grafıkalarmen qatar, jańa janr - ınstallıatsııa, obekt, performans, vıdeo jáne medıa-art baǵyttary da keńinen qamtylǵan. Onda Almagúl Meńlibaeva, Sáýle Súleımenova, Rashıd Núrekeev, Ashat Ahmedıarov syndy 10-nan astam belgili sýretshilerdiń týyndylary qoıyldy.
Kórmeniń halyqaralyq jetekshisi Lıza Ahmadı «Álemniń 20-dan astam elderinde úlken baǵa alǵan týyndylar ulttyq bolmysymyzdy aıshyqtap, óner, mádenıet, tabıǵat tamashalary syndy qundylyqtardy sýretteıtindigin aıtady.
«QR Tuńǵysh Prezıdenti N. Á. Nazarbaevtyń "Uly dalanyń jeti qyry" atty maqalasynda atap kórsetkendeı, ulttyq qundylyqtar men rýhanı baılyq bizdiń biregeıligimizdiń negizine aınalýy tıis. Elbasy maqalasyndaǵy kórsetilgen «Atqa miný mádenıeti», «Uly daladaǵy ejelgi metallýrgııa», «Altyn adam», «Túrki áleminiń besigi», «Uly Jibek joly», «Qazaqstan - alma men qyzǵaldaqtyń otany» taraýlaryndaǵy Qazaq halqynyń ulttyq tarıhynan oryn alatyn dúnıeler týraly syr shertetin týyndylar kórmede qoıyldy», - deıdi Lıza Ahmadı.
Aıta keteıik, bul óner týyndylaryn qala turǵyndary aldaǵy 1 aı boıy Jambyl oblystyq drama teatryna baryp, tegin tamashalaı alady. Sosyn kóshpeli kórme kerýeni Qyzylorda qalasyna jol tartatyn bolady.
