«Uly dala» ejelgi óner jáne tehnologııalar mýzeıin ashý kerek - Prezıdent
«Uly dala» atty ejelgi óner jáne tehnologııalar mýzeıin ashýǵa tolyq múmkindigimiz bar. Oǵan ozyq óner men tehnologııa úlgilerin - ań stılinde jasalǵan buıymdardy, «Altyn adamnyń» jaraqtaryn, jylqyny qolǵa úıretý, metallýrgııany damytý, qarý-jaraq, saýyt-saıman daıyndaý úderisin kórsetetin zattardy jáne basqa da jádigerlerdi jınaqtaýǵa bolady. Onda Qazaqstan jerinen tabylǵan qundy arheologııalyq eskertkishter men arheologııalyq keshenderdiń ekspozıtsııalary qoıylady. Bul zattar tarıhı dáýirlerdiń qandaı da bir kezeńindegi ártúrli sharýashylyq salalarynyń damý úderisin kórsetedi», - dep jazady QR Prezıdenti.
Memleket basshysy maqalada «Uly dalanyń uly órkenıetteri» atty jalpyulttyq tarıhı rekonstrýktsııalar klýbyn quryp, sonyń negizinde Astanada jáne Qazaqstannyń ózge de óńirlerinde ejelgi saqtar, ǵundar, uly túrki qaǵandarynyń dáýiri jáne basqa da taqyryptar boıynsha festıvaldar ótkizýge bolatyndyǵyna nazar aýdartady. Buǵan qyzyǵýshylyq bildirgen adamdardy tarta otyryp, osy taqyryptar aıasyndaǵy jumystardy bir mezgilde júrgizýge bolatyndyǵyn atap ótedi.
«Ejelgi Otyrar qalasynyń birqatar nysandaryn - úıleri men kóshelerin, qoǵamdyq oryndaryn, sý qubyrlaryn, qala qamalynyń qabyrǵalary men taǵy da basqa jerlerin ishinara qalpyna keltiretin týrıstik joba da qyzyqty bolmaq. Osynyń negizinde bilimdi dáripteýge jáne týrızmdi damytýǵa basa mán berilýi qajet», - deıdi Nursultan Nazarbaev.
Aıta keteıik, Prezıdent atalmysh maqalasynda 2019 jyly Astanada Túrkologtardyń dúnıejúzilik kongresin jáne ártúrli elder mýzeıleriniń ekspozıtsııalaryna ejelgi túrki jádigerleri qoıylatyn Túrki halyqtarynyń mádenı kúnderin uıymdastyrý kerektigin aıtty. Sonymen birge, «Uly dalanyń uly esimderi» atty entsıklopedııalyq saıabaq ashýdy usyndy.
