Uly Dala eliniń bolashaǵyna arnalǵan baǵdarsham
ASTANA. QazAqparat - «Men Memleket basshysy Nursultan Nazarbaevtyń «Bolashaqqa baǵdar: rýhanı jańǵyrý» atty maqalasyn nebary shırek ǵasyrlyq jasyna kelgen táýelsiz Qazaq eliniń bolashaǵyna baǵdar beretin asa mańyzdy qujat dep qabyldadym. Bul maqalada Elbasy jańa ǵasyrda ár qazaqstandyqtyń ýaqyt synynan súrinbeı ótýi úshin jańasha oılaýy, sanasyn jańǵyrtýy jas memleketimizdiń aldyńǵy qatarly elderdiń qataryna qosylýy úshin asa mańyzdy faktor ekendigin tereń paıymdap kórsetedi»,-degen oıymen bólisti Shyǵys Qazaqstan oblystyq Máslıhatynyń depýtaty Rıza Moldasheva.
Onyń pikirinshe, «Qazaq «Týǵan jerge týyńdy tik» dep beker aıtpaǵan. Patrıotızm kindik qanyń tamǵan jerińe, ósken aýylyńa, qalań men óńirińe, ıaǵnı týǵan jerińe degen súıispenshilikten bastalady. Sol sebepti men «Týǵan jer» baǵdarlamasyn qolǵa alýdy usynamyn»,- degeni jastardy patrıottyq rýhta tárbıeleý isinde baǵa jetpes usynys.
«Ásirese búgingideı shetelden jumaq izdep ketip jatqan jastarǵa oı sala otyryp, týǵan jer men ata-ana aldyndaǵy paryz ben qaryzdy óskeleń urpaqtyń oıyna sińirip, sanasyna silkinis ákeletin qadam dep qabyldadym. Elbasy týǵan jer, ósken el taqyrybyna mańyz beripti. Ata-babalarymyz aq naızanyń ushymen, aq bilektiń kúshimen qorǵap, búgingi urpaǵyna aman-esen saqtap jetkizgen atamekenge adaldyq ıdeıasy dep qabyldadym. Sonymen qatar qazaq eliniń ekonomıkalyq turǵydan básekege qabiletti bola bilýi, ol úshin bilim men ǵylymdy tereń meńgerý qajettigi - oqyǵan adamǵa oı salarlyqtaı qundylyq.
Elimiz egemendigin alǵannan beri, latyn qarpine kóshý jaıy únemi aıtylyp keledi. Aıtylǵan usynystar kóp bolǵanymen, sheshimin taba almaı júrgen ózekti máseleniń birine Elbasy sońǵy núkteni qoıǵan sııaqty»,-deıdi Máslıhat depýtaty.
«Qazaqstan-2050» Strategııasynda 2025 jyldan bastap latyn álipbıine kóshýge kirisýimiz kerektigin málimdegen QR Prezıdenti 2025 jylǵa qaraı is qaǵazdaryn, merzimdi baspasózdi, oqýlyqtardy - bárin de latyn álipbıimen basyp shyǵara bastaý qajettigin aıtyp tapsyrmalar berdi, naqty mejeni atady. Latyn álipbıine negizdelgen qazaq jazýy bizge kerek pe, joq pa? Eger kóshe qalsaq, bul ózgeris bizge ne beredi degen kópshiliktiń kókeıindegi sharyqtaý shegine jetken saýalǵa halyq jaýap aldy.
Bul oraıda QR Bilim jáne ǵylym mınıstrligine artylǵan salmaq ta az emes ekendigin baıqadyq. Alaıda bul táýelsiz eldi bolashaqqa aparatyn bilimdi, patrıot urpaq tárbıeleý isine Elbasynyń alańdaýshylyǵynan týǵan mańyzdy qujat ekendigi daýsyz»,-deıdi depýtat.
