«Uly Dala Eline saıahat» ekspedıtsııasy myń shaqyrymdyq taý jolyn eńserdi
Ekspedıtsııa qatysýshylary atalǵan baǵyt boıynsha Baıanqol ańǵaryna jol tartty. Almatydan ańǵarǵa deıingi qashyqtyq - 380 shaqyrym. Saıahatshylar Qazaqstannyń eń bıik núktesi - Han Táńiri shyńyn, sonymen qatar Mármár dýal, Ústirt shyńy tárizdi alty myńdyq jáne Shekarashy, Qarlytaý, Qazaqstan, Baıankól, Semenov tárizdi bes myńdyq bıiktikterin tamashalady.
Kelesi aıaldama - aşy-tuzdy Tuzkól taý kóli boldy. Mundaǵy bir lıtr sýdyń quramyndaǵy tuz mólsheri - 300 gr. Kóldiń emdik qasıetin Óli teńizben salystyrýǵa bolady.
Qara jolmen 30 mınýt júrgen soń, ekspedıtsııa qatysýshylarynyń aldynan Shalkóde dalasy shyqty. Ekspedıtsııa toby munda kelgende, «Jetisý júırigi» festıvali ótip jatqan bolatyn. Qatysýshylar ulttyq sporttyń aýdaryspaq, qyz qýý, qazaq kúresi tárizdi oıyndary men eń basty saıys - 4 sanat boıynsha ótken báıgeniń kýási boldy.
Shalkóde dalasy - jaqyn eldi mekenderdiń jaılaýy. Maýsym men qyrkúıek aralyǵynda munda 100-ge jýyq kıiz úı tigiledi. Malshylar týrısterdi osy jerde árdaıym qýana qarsy alatynyn jetkizdi.
Ekspedıtsııa qatysýshylary Shalkódeden kelesi pýnkt - Dardamty týrbazasyna deıin atpen bardy. Shonjy aýylynyń ońtústik-shyǵysyna qaraı shamamen 48 shaqyrym jerde, teńiz deńgeıinen 1180 metr bıiktikte ornalasqan týrbazada olar qusbegi Qýanysh Isabekovpen tanysty. Ol qonaqtarǵa qus baptaýdyń qupııalaryn aıtyp berdi. Búrkitpen saıat qurý - qazaq dástúriniń bir bólshegi. Qýanyshqa ártúrli elderden, sonyń ishinde Frantsııa, Ulybrıtanııa, Germanııa jáne arab elderinen týrıster jıi keledi.
Ary qaraı, saıahatshylar Jińishke men Shilikti ózenderin, Assy ústirtin, Sharyn shatqaly men Túrgen ańǵaryn, Aıýly jáne Qaıraq sarqyramasyn, Batan shatqalyn aralap, 29 shildede Almatyǵa keldi.
«Ekspedıtsııaǵa qatysqan týrıstik kompanııalar, bizdiń ishki týrısterge de, sondaı-aq, ózge elden kelgenderge de qyzyqty usynystar jasaı alatynyna senimdimiz. Jáne osy baǵyt áli tumsa qalpynda saqtalǵan tabıǵı oryndar men mádenı mekenderdi aralatyp, tipti órkenıet áserine ushyramaǵan adamdardyń turmysyn kórsetetindikten, bul usynystar úlken suranysqa ıe bolady dep úmittenemiz», - deıdi «Kazakh Tourism» UK» AQ Basqarma Tóraǵasynyń orynbasary Qaırat Sadýaqasov.
«Uly Dala Eline saıahat» - bul Qazaqstannyń 20 tabıǵı nysanyn aralaıtyn biregeı ekspedıtsııa ekenin jazǵan bolatynbyz.
«Uly Dala Eline saıahat» ekspedıtsııasy 6 baǵyt boıynsha 6 týrıstik klasterdi qamtı otyryp, mańyzdy tabıǵı nysandarǵa barady jáne ol 2018 jyldyń 26 qyrkúıegine deıin jalǵasady.
