«Uly dala boıaýlary» atalatyn jańa joba qolǵa alyndy
ALMATY. 6 naýryz. QazAqparat - Almatyda 11 naýryz kúni «Uly dala boıaýlary» serııasyna kiretin fotoalbomdardyń tanystyrylymy jáne Atyraý jáne Jambyl oblystaryna arnalǵan fotoqoıylymnyń ashylýy ótedi.
Bul jańa basylym jobasynyń avtory - «Aldońǵar» mádenıetti damytý» qoǵamdyq qory. Ol Atyraý oblysy týraly «Shejire saǵasy» jáne Jambyl oblysy týraly «Álem aınasy» dep atalatyn eki fotoalbommen ashylmaq. Olar eki óńirdiń tabıǵat sulýlyǵy men mádenı ereksheligin jańa qyrynan kórsetýimen erekshenedi. Albomdy jasap shyǵarý úshin jyldyń túrli maýsymdarynda zamanaýı fotografııalyq quraldar qoldanylyp, áýeden sýretke túsirý arqyly arnaıy fotoekspedıtsııalar uıymdastyryldy.
«Qazaqstannyń árbir óńiri - bul tabıǵat pen mádenıettiń biregeı injý-marjany. Sondyqtan biz ony saqtap, urpaqqa mıras etip qaldyrýǵa mindettimiz. «Uly dala boıaýlary» jobasy sheńberinde basyp shyǵarylǵan fotoalbomdar oqyrmandar arasynda patrıottyq maqtanysh, óz Otanyna degen mahabbat pen qurmet sezimin týdyrady dep úmittenemiz», - deıdi joba dırektory jáne belgili munaıshy Borıs Shyrdabaev. Onyń aıtýynsha, bul toptamaǵa Qazaqstannyń barlyq oblystary týraly fotokitaptar kirmek. Ol elimizdiń barlyq óńirleri biriktirilgen basylymmen aıaqtalady dep josparlanyp otyr.
