«Uly dala áýeni»: Astanada 1 myń mýzykant bir sahnada óner kórsetti
«Astana Opera» opera jáne balet teatryna tanymal mýzykanttardyń ónerin tamashalaýǵa kóp kórermen jınaldy. Ónerpazdardyń kásibı merekesine oraı ózderiniń izgi tilekterin aıtý úshin Senat tóraǵasy Máýlen Áshimbaev, Májilis tóraǵasy Erlan Qoshanov, Mádenıet jáne sport mınıstri Ashat Oralov arnaıy keldi.
Sonymen qatar, kontsertti tamashalaýǵa tanymyl kıno jáne teatr akterleri, óner juldyzdary shaqyryldy.
Іs-shara barysynda Qazaqstan Prezıdenti Qasym-Jomart Toqaev mádenıet jáne óner salasy mamandaryna tabys tilep, quttyqtaý hat joldady. Memleket basshysynyń hatyn mınıstr Ashat Oralov oqyp berdi.
«Sizderdi kásibı merekelerińizben shyn júrekten quttyqtaımyn. Árbir eldiń mádenıeti - adamzat órkenıetiniń asyl qazynasy, onda ulttyń búkil bolmysy, aqyl oıy, parasat paıymy túgel kórinis tapqan. Óneri órkendegen halyqtyń mereıi ústem, mártebesi bıik bolady. Sizder rýhanı qundylyqtarymyzdy dáriptep, zaman talabyna saı jańǵyrýyna zor úles qosyp kelesizder. Jahandaný dáýirinde ulttyq biregeıligimizdi saqtap qalý - aıryqsha mańyzdy. Osy oraıda tól mádenıetimizdi damytý barshamyzǵa ortaq mindet. Qazaqstan - san qyrly mádenı murasy bar rýhanı baı memleket. El ishi - óner kenishi dep beker aıtylmaǵan. Týma talanty men eseli eńbeginiń arqasynda ult abyroıyn asqaqtatqan birtýar azamattarǵa halqymyz qashanda kende bolmaǵan. Búgingi býyn aldyńǵy tolqynnyń ónegeli jolyn laıyq túrde jalǵastyrady dep bilemin. Olardyń arasynda ónerimen álemdi moıyndatqan erekshe daryn ıeleri bar. Mádenıetimizdiń kókjıegin keńeıtip, jas urpaqty rýhanı baıyta túsý úshin aıanbaı eńbek etip júrgen barshańyzǵa shynaıy rızashylyǵymdy bildiremin. Sizderge baq bereke tolaǵaı tabys tileımin. Ónerlerińiz órge bassyn!», - delingen Memleket basshysy hatynda.
Atap aıtqanda, búgin «Astana Opera» teatrynda Mádenıet jáne óner qyzmetkerleri kúnine arnalǵan aýqymdy merekelik kesh ótti. Osyndaı aýqymda alǵash ret ótkizilgen aıtýly is-shara aıasynda sahnada bir ýaqytta elimizdiń ár óńirinen kelgen 1000-nan astam mýzykant óner kórsetti.
Tyńdarmandardy Astanadan jáne Almatydan qurama sımfonııalyq orkestrler men horlardyń, sondaı-aq Aqtaý, Shymkent, Semeı, Aqtóbe, Óskemen, Oral, Pavlodar, Qostanaı, Petropavl, Qaraǵandy, Kókshetaý qalalarynyn jáne basqa da oblystardan arnaıy kelgen mýzykanttar óz ónerimen tánti etti.
Kontserttik baǵdarlamaǵa elimizdiń óńirlerinen kelgen 24 shyǵarmashylyq ujym ókilderi qatysty. Hor ujymdary, orkestrler, vırtýoz aspapshylary, opera jáne halyq ánshileri ataqty skrıpkashy, dırıjer jáne kompozıtor, Qazaqstan Respýblıkasynyń eńbek sińirgen qaıratkeri Marat Bısenǵalıevtiń «Uly dala áýeni» atty odasyn birge oryndady.
Otandyq mádenıet jáne óner qyzmetkerlerine arnalǵan aýqymdy týyndy ulttyq jáne klassıkalyq mýzykany úılestirgen. Tyńdaýshylar áserge toly tanys áýenderdi jańa nusqada tamashalaı aldy.
Marat Bısenǵalıevtiń bul avtorlyq jobasynyń ereksheligi – 10 bólimnen turatyn odada halqymyzdyń bolmysyn, mádenıetin jan-jaqty ashatyn shyǵarmalar jınaqtalǵan.
Kesh qonaqtary 50 mınýtqa jýyq ýaqyt ishinde «Uly dala», «Shattyq», «Samal», «Qarlyǵash», «Jelsiz túnde jaryq aı», «Saryarqa», ABAI, «Aıttym sálem, Qalamqas», «Dýdaraı», «Týǵan jer» syndy kompozıtsııalardy tyńdady.
Osynaý aıtýly vokaldyq-sımfonııalyq týyndyny oryndaýǵa tanymal ónerpazdar qatysty. Olardyń qatarynda soprano Zarına Altynbaeva bar. Sondaı-aq skrıpkada jeke partııany Marat Bısenǵalıev, saksofonda - Arýhat Musaıypov, ulttyq aspaptarda Serik Nurmoldaev, Anar Qasymova, Abzal Aryqbaev, Asqar Soltanǵazın oryndady. Daryndy mýzykanttarǵa áıgili qazaqstandyq dırıjerler Abzal Muhıtdın men Marat Bısenǵalıev, sondaı-aq qurama hor dırıjeri Beıimbet Demeýov jetekshilik etti.
Dırıjer Abzal Muhıtdınniń sózine qaraǵanda, búgingi kontsert kezinde minsiz ansambl bolýy úshin zamanaýı tehnıkalyq quraldar paıdalanyldy.
«Ekinshiden, kontsertke Qazaqstannyń túkpir-túkpirinen kelgen kásibı deńgeıi joǵary mýzykanttar men hor ujymdary jınalǵanyn aıtý kerek. Menińshe, osyndaı aýqymdy is-sharalar barsha yqylaspen oryndalsa, olar únemi joǵary nátıjege qol jetkizedi. Sondyqtan búgingi bizdiń osyndaı joǵary nátıjemizge barlyq kórermen kýá boldy. Álemde mundaı aýqymdy jobalardy júzege asatyndar sırek kezdesedi. Repertýar da Qazaqstannyń barlyq sulýlyǵyn kórsetetindeı etip tańdalǵan. Elimizdiń batysy da, shyǵysy da, soltústigi de, ońtústigi de keńinen qamtyldy. Munyń barlyǵyn úlken ıdeıa bolyp biriktirildi. Biz Qazaqstandaǵy birtutas ult qaǵıdatyn aıtqymyz keldi. Jobanyń jetekshisi Marat Bısenǵalıev búgingi is-sharanyń uıymdastyrýshysy boldy, onyń mundaı jobalardy iske asyrýdaǵy tájirıbesi úlken ról atqardy», - dedi Abzal Muhıtdın.
Merekelik kontsert aıaqtalǵannan keıin, kesh qonaqtary teatrdan kópke deıin tarqamady. Teatr foıesinde bir-birin shyn júrekten qutty bolsyn aıtyp, mádenıet salasyndaǵy sońǵy jańalyqtardy jarııalap, estelik sýretke túsip jatqan óner qaıratkerlerin, mýzykanttardy baıqadyq.
Sonymen qatar búgin mınıstr Ashat Oralov sahnada óner kórsetken ártister men shyǵarmashylyq ujymdardyń jetekshilerine alǵys hat tabystady.
«Mádenıet jáne óner qyzmetkerleri kúnine arnalǵan is-sharalar aptalyǵyn tıisti deńgeıde aıaqtadyq dep oılaımyn. Bizdiń bastamamyzdy qoldaǵandardyń barlyǵyna jáne Memlekettik opera jáne balet teatrynyń sahnasynda óner kórsetýge shaqyrýdy qabyldaǵan shyǵarmashylyq ujymdarǵa alǵys aıtqym keledi. Osy jobaǵa qoldaý bildirip, qatysqany úshin Marat Beısenǵalıevke erekshe alǵys. Mınıstrligimiz mádenıet pen óner salasyn damytý jáne qoldaý baǵytyndaǵy jumysty jalǵastyrady. Aldaǵy ýaqyta belgilengen naqty tapsyrmalardy sizdermen birge oryndaı alatynymyzǵa kúmánim joq»,- dedi QR Mádenıet jáne sport mınıstri Ashat Oralov.
Atalǵan vedomstvonyń málimetinshe, bir apta boıy elimiz boıynsha kontsertter, kórmeler, dóńgelek ústelder otyrystary jáne basqa da 100-den astam is-shara ótti. Sondaı-aq, 300 mádenıet qyzmetkeri «Mádenıet salasynyń úzdigi» tósbelgisimen, 2000-y qurmet gramosymen jáne alǵys hattarmen marapattaldy.
Ashat Oralov búgingi kontsert merekelik is-sharalardyń keremet kýlmınatsııasy bolǵanyn jáne osyndaı keshter budan bylaı jaqsy dástúrge aınalatynyna senim bildirdi.
