Uly Dala ańyzy, kóshpendiler múlki, jylqy: Elordada ulttyq kórme ashyldy

NUR-SULTAN. QazAqparat – Nur-Sultan qalasynda ulttyq qundylyqtardan habar beretin kórme ashyldy, dep habarlaıdy QazAqparat tilshisi.

Elordadaǵy Beıbitshilik jáne Kelisim saraıynda ashylǵan kórmege kartınkalarmen qatar buıymdar qoıylǵan.

«Biz bıylǵy aıtýly 2 data aıasynda, Tuńǵysh Prezıdent kúni jáne Táýelsizdiktiń 30 jyldyǵyna oraı arnaıy joba usynýdy josparlaǵanbyz. Búgin sol joba aıasynda kópshilik nazaryna 4 ekspozıtsııany usynyp otyrmyz. Sonyń biri «Tulpar» dep atalady. Jylqynyń qazaq halqy úshin qandaı qasıetti janýar ekenin bárimiz bilemiz. Onyń ústine ónerde jylqy ol sulýlyqtyń sımvoly. Sondaı-aq, bizdiń uly dala túrli ańyzdar men mahabbat hıkaıasyna toly. Búgingi kórmede osy salaǵa qatysty týyndylar bar. Ol kartınalardy Nursultan Nazarbaev qory usyndy», - dedi «Qulanshy» zamanaýı óner ortalyǵynyń jetekshisi Leıla Mahat.

Kórmege qazaqstandyq sýretshilerden bólek, túrik jáne moldava sýretshileriniń týyndylary da qoıylǵan.

«Men sımvoldardy beınelegendi unatamyn. Kartınam arqyly jylqy álemin kórsetýge tyrystym. Jylqyny beıneleýdiń ózindik fılosofııasy bar. Ol aspan men jerdi ózara úılestiredi», - deıdi qazaqstandyq sýretshi Sembiǵalı Smaǵulov.

Moldovalyq sýretshi Natalıa Karakoz kórmeniń ashylýyna oraı elordaǵa arnaıy kelipti.

«Maǵan jylqy óte unaıdy. Ásirese jylqy portretin salý. Jalpy portret adam bolsyn, janýar bolsyn onyń qasıetin, minezin kórsetedi. Menimshe, jylqy eń aqyldy janýarlardyń biri. Sonymen qatar jylqy sulý janýar», - dedi sýretshi.

Sondaı-aq, atalǵan kórmege otandyq belgili sheber Serjan Bashırovtyń «Kebeje» atty kóshpendi halyq tutynǵan zattar qoıylǵan.

Elorda halqy men qonaqtary úshin keler jyldyń qańtaryna deıin ulttyq kórmeniń esigi ashyq.