Uly dala altyny: Brıtan halqy 4 aı tamashalaǵan shyǵysqazaqstandyq saq kórmesi aıaqtaldy
Kembrıdj ýnıversıteti janyndaǵy Fıtsýılıam murajaıynda «Uly dala altyny» kórmesiniń resmı jabylýy ótti.
Brıtandyq BAQ «halyqaralyq sensatsııa» dep ataǵan jáne «Apollo» jýrnaly álemniń úzdik alty kórmesiniń biri dep ataǵan biregeı kórme Ulybrıtanııada tórt aı boldy.
Eldegi karantındik shekteýlerge qaramastan, Qazaqstan Respýblıkasy Táýelsizdiginiń 30 jyldyǵyna arnalǵan kórmeni 25 myńǵa jýyq adam tamashalady.
Kórmede Shyǵys Qazaqstan oblysyndaǵy Berel, Shilikti jáne Eleke Sazy jerleý keshenderinen bizdiń dáýirimizge deıingi VIII-III ǵasyrlarǵa jatatyn júzdegen biregeı altyn jádigerler usynyldy.
Eksponattar kelýshilerge saqtardyń turmysyn, tarıhy men murasyn tanýǵa, sondaı-aq ejelgi kóshpendilerdiń qazirgi qazaq mádenıetimen túıisý núktelerin zertteýge múmkindik berdi.
Jabylý saltanatynda sóz sóılegen Qazaqstannyń Ulybrıtanııadaǵy Elshisi Erlan Ydyrysov kórmeniń halyqaralyq aýdıtorııaǵa Qazaqstannyń baı tarıhyn ashqanyn jáne ortaq maqsat – ejelgi aqparat kózderin ashyp, adamzat tarıhyn tereńirek tanýǵa umtylý jolyndaǵy ǵylymı jáne mádenı yntymaqtastyqtyń kórinisi bolǵanyn atap ótti.
Fıtsýılıam murajaıynyń dırektory Lıýk Saıson Shyǵys Qazaqstan oblysynyń ákimi Danıal Ahmetovke, Shyǵys Qazaqstan tarıhı-ólketaný murajaıynyń basshylyǵyna, professorlar Zaınolla Samashev pen Ábdesh Tóleýbaevqa tyǵyz yntymaqtastyq úshin alǵysyn bildirip, kórme barysynda Kembrıdj ýnıversıtetiniń ǵalymdary qazaqstandyq arheologtarmen birlesip biregeı saq artefaktilerin zerttegenin aıtty.
Ǵylymı zertteýlerdiń nátıjeleri aldaǵy aılarda álemdik qaýymdastyqqa usynylady.
Ol sondaı-aq kórme men oǵan ilespe zertteýler Qazaqstan men Ulybrıtanııanyń ǵylymı qoǵamdastyqtary arasyndaǵy yntymaqtastyqty tereńdetý úshin berik irgetas qalaǵanyn atap ótti.
