Ultymyzdyń densaýlyǵy jáne demografııalyq ósýi qaýip aldynda tur - «Er adamdardyń densaýlyǵy» atty aktsııanyń nátıjesi
ALMATY. Qarashanyń 16-sy. QazAqparat /Názıra Eleýhan/ - Álemdegi er adamdardyń 150 mıllıony jáne jarty mıllıon qazaqstandyqtar erektili dısfýnktsııa aýrýynan zardap shegýde.
Bul aýrý ýrologııalyq aýrýlardyń ishinde búgingi kúni 3-shi oryndy alyp otyr. Qazaqstanda tirkelgen 24 000 aýyratyn er adamdardyń, 56 paıyzy ár túrli formadaǵy erektili dısfýnktsııalarymen aýyrady. Bul týraly búgin B.Jarbosynov atyndaǵy ýrologııa ǵylymı ortalyǵynyń uıymdastyrýymen ótken baspasóz májilisinde ortalyqtyń dırektory, medıtsına ǵylymdarynyń doktory, professor, elimizdiń Densaýlyq mınıstrliginiń bas ýrology Myrzakárim Alshynbaev málim etti, dep habarlaıdy QazAqparat.
«Biz qarasha aıynyń 11-i men 13-i kúnderi aralyqtarynda bizdiń ýrologııa ortalyǵynyń jetekshi mamandary alǵash ret «Er adam densaýlyǵy» kúnderin ótkizdi. Ol sharanyń maqsaty - er adamdardyń densaýlyq jaǵdaıyn jaqsartý maqsatynda aýrýlardyń aldyn-alý, ómiriniń sapasyn arttyrý bolyp tabylady. Er adamdardyń bedeýligi, erektili dısfýnktsııa jáne taǵy da basqa er adamdardyń aýrýlary búgingi kúni elimizde ǵana emes, álemdik máselege aınalyp otyr. Halqymyzdyń sany kóp bolýy, árıne er adamnyń densaýlyǵyna da baılanysty. Sondyqtan da biz ýrologtardyń bas qosýynda «Er adamdardyń densaýlyǵy» atty baǵdarlamany qabyldadyq. Bul joba Parlamentte qoldaý tapqan bolatyn. Ótkizilgen sharalardyń nátıjesi bolatynyna senimdimin», dedi elimizdiń Densaýlyq mınıstrliginiń bas ýrology Myrzakárim Alshynbaev. Onyń aıtýynsha, bul problemalardy er adamdardyń kópshiligi jasyrady, ne bolmasa moıyndamaıdy. Sondyqtan alǵash ret qazaqstandyq medıtsına tájirbıesinde bizdiń ǵalymdar elimizdiń er adamdaryna birinshi qadam jasady. «Qoǵamdaǵy mentalıtet ózgerýi kerek, barlyq jastaǵy er adamdar óz densaýlyǵyn oılaýy kerek», dedi bas ýrolog M. Alshynbaev.
Aktsııa barysynda 15-pen 84 jas aralyǵyndaǵy 717 er adam tekserilýden ótken. Onyń 67 paıyzy ár túrli patologııalyq aýrýlarmen shaldyqqany anyqtalǵan.
S.Asfendııarov atyndaǵy QazUMÝ-tiń ishki aýrýlar kafedrasynyń meńgerýshisi Baǵıra Tókeshovanyń aıtýynsha, er adamdardyń 75 paıyzy ártúrli ýrologııalyq aýrýlarmen aýyrady. "Olardyń ishinde, ásirese, jas jigitterdiń aýyratyny qorqynysh týdyrady. Tekserý barysynda kópshiligi semizdik, qan qysymy, dıabet aýrýlarymen aýyratyndyǵy anyqtaldy. Ultymyzdyń densaýlyǵy jáne demografııalyq ósýi qaýip aldynda tur", dep atap ótti B. Tókeshova.
