«Ulttyq Ónim – 2026»: kórmege 35 myńnan astam adam keldi
ASTANA. KAZINFORM – Astanada ótken IX «Ulttyq Ónim – 2026» kórmesine bıyl 35 myńnan astam adam kelgen. Kórmege 600-ge jýyq kásipker qatysyp, otandyq ónimderdiń jańa túrlerin usyndy.
– Buǵan deıingi segiz kórmede negizinen óńdeý jáne qaıta óńdeý salasynyń kásipkerleri qatysqan edi. Bıyl kórmeni keńeıtip, medıtsına, bilim berý, IT jáne kreatıvti ındýstrııa ókilderin de qostyq. Osy jylǵy kórme rekordtyq kórsetkishtermen ótti deýge bolady, – dedi Jibek Joly telearnasynyń «Búgin.LIVE» baǵdarlamasynda «Damý» kásipkerlikti damytý qorynyń basqarýshy dırektory Nurbol Janabekov.
Nurbol Janabekovtyń aıtýynsha, ótken jyly kórmege 366 kásipker qatyssa, bıyl olardyń sany 600-ge jýyqtaǵan.
– Ótken jyly kórmege 26 myńǵa jýyq adam kelse, bıyl 35 myńnan astam kelýshi tirkeldi. Biz Qazaqstanda az shyǵarylatyn nemese múlde óndirilmeıtin taýar óndirýshilerine basymdyq berýge tyrystyq. Sonymen qatar kórmege qatysýshylardy irikteýde óńirlik erekshelik te eskerdik. Máselen Atyraý oblysynan munaı servısi salasynyń kásipkerleri kelse, Pavlodardan óńdeý ónerkásibi, Qaraǵandydan qaıta óńdeý salasy, al Shymkentten aıaq kıim men kıim óndirýshileri qatysty, – dedi Nurbol Janabekov.
Sondaı-aq kórme tek saýda alańy emes, tájirıbe almasatyn, netvorkıng ornatatyn úlken platforma formatynda ótti. Paneldik sessııalarda jasandy ıntellektini qoldaný, bıznes júrgizý, qarjylandyrý máseleleri talqylanǵan. Qor basshysynyń aıtýynsha, kórmege Ázerbaıjan, Grýzııa, Túrkııa, Qyrǵyzstan, Reseı jáne Frantsııadan qonaqtar kelgen. Sondaı-aq halyqaralyq qarjy uıymdarynyń ókilderi qatysqan.
Aıta keteıik, buǵan deıin, otandyq óndirýshilerdiń dástúrli ІH «ULTTYQ ÓNIM – 2026» kórmesi óz jumysyn bastaǵanyn jazǵan edik.
