Ulttyq ónim - 2019: Elordada otandyq taýar óndirýshilerdiń kórmesi ótip jatyr
NUR-SULTAN. QazAqparat - Bıylǵy kórmede ártúrli saladaǵy 500-ge tarta kásiporynnyń ónimi usynyldy, dep habarlaıdy QazAqparat tilshisi.
Kórme aıasynda «Damý» qorynyń baǵdarlamalary arqyly memleketten qoldaý tapqan shaǵyn jáne orta bıznestiń ónimderi usynylýda. Azyq-túlik, qurylys, jıhaz, kıim, mamandandyrylǵan tehnıka men jabdyqtar, sondaı-aq sývenırlik jáne polıgrafııalyq ónimderge kelýshiler kóptep qyzyǵýshylyq tanytyp jatyr. Shara barysynda dástúrli túrde «Halyq tańdaýy» atty táýelsiz degýstatsııalyq baıqaý ótkizilip, qazaqstandyq óndirýshilerdiń erler men áıelder kıimderiniń kollektsııalary tanystyrylady.
«Atalǵan aýqymdy is-shara búgingi tańda bizdiń elordanyń vızıttik kartasyna aınalyp barady. Sebebi, bul shara elimizdiń ekonomıka, ónerkásip, shaǵyn jáne orta bıznes salasyndaǵy jetistikterin pash etedi. Otandyq taýar óndirý máselesi, ásirese shaǵyn jáne orta bıznes salasyndaǵy suraqtar - biz úshin basymdyqqa ıe baǵyt ekenin aıta ketý kerek. QR Tuńǵysh Prezıdenti - Elbasy Nursultan Nazarbaev naqty strategııalyq tapsyrma júktedi - 2030 jylǵa qaraı JІÓ-degi shaǵyn jáne orta bıznestiń úlesin 35 paıyzǵa deıin arttyrýymyz kerek. 2050 jylǵa qaraı 50 paıyzǵa deıin jetýi kerek», - deıdi QR Indýstrııa jáne ınfraqurylymdyq damý mınıstri Roman Sklıar.
Mınıstrdiń aıtýyna qaraǵanda, Qazaqstan taýar óndirýshileriniń áleýeti atalmysh maqsatqa jetýge ábden múmkindik beredi.
«Ótken jyldyń qorytyndysy boıynsha ShOB-tyń JІÓ-degi úlesi - 28 paıyzdan asty. ShOB kásiporyndary 26 trıllıon teńgeniń ónimin shyǵardy. Buǵan qosa ShOB-tyń 1,2 mln sýbektisi 3 mıllıon adamdy (jumyspen qamtylǵandardyń 37 paıyzy) jumyspen qamtyp otyr. Bul kórsetkishterge «Jol kartasy - 2020» baǵdarlamasynyń sátti oryndalýy muryndyq bolǵanyn atap ótý kerek. Atalmysh baǵdarlama aıasynda ótken jyly ǵana «Damý» qory 22 myń kásiporynǵa 500 mlrd teńge kóleminde nesıe berdi», - deıdi Roman Sklıar.
Kórme 6 mamyrǵa deıin jalǵasady. Shara barysynda otandyq óndirýshiler Ázerbaıjan, Ońtústik Koreıa, Malaızııa, Polsha, Túrkııa, Ózbekstan elderiniń bıznes-delegatsııa ókilderimen kezdesý ótkizedi.
