Ulttyń zııatkerlik áleýeti týraly kodeks qabyldansa ıgi - H. Valıev
ASTANA. 15 qarasha. QazAqparat - Ulttyń zııatkerlik áleýeti týraly kodeks qabyldansa ıgi. Búgin QR Parlamenti Senatynyń jalpy otyrysynda Úkimet basshysynyń atyna saýal joldaǵan senator Hýsaın Valıev osylaı málim etti.
«Memleketimizdiń ómirinde erekshe oryn alatyn, zamanaýı bilim jáne ǵylym menedjmentindegi úlgi bolýǵa, sonymen birge ınnovatsııalyq serpiliske eń basty qatysýshy bolýǵa mindettelgen Nazarbaev ýnıversıtet bolyp tabylady. Nazarbaev ýnıversıtetiniń stýdentter aldyndaǵy óz dárisinde Memleket basshysy: «Biz bilim - ǵylym - ınnovatsııa úshtigi bılegen postındýstrııalyq álemge jyljyp kelemiz» dep aıtty. Osyǵan oraı, atalǵan úshtikti bir quqyqtyq qujatqa biriktirý qısyndy kóriner edi. Atalmysh qujatty - «Ulttyń zııatkerlik áleýeti týraly kodeks» dep ataýǵa bolady», - deıdi senator.
Bul rette depýtat bilim, ǵylymdy jáne ınnovatsııa biriktiretin zamanaýı keshen qurýdyń oryndy bolatynyn alǵa tartyp, olardyń basyn qosatyn keshendi zııatkerlik áleýeti boıynsha Sátpaev atyndaǵy Qazaq ulttyq tehnıkalyq ýnıversıtetiniń, ǵylymı-zertteý ınstıtýttarynyń, «Parasat» holdınginiń jáne t.b. negizinde qurýǵa bolatyndyǵyn aıtty.
«Mundaı biriktirýdiń maqsaty bıik ǵylymı nátıjelerdiń tabysyna jetý jáne bilikti kadr daıarlaý úshin, eń aldymen ınjenerlik mamandyqtar boıynsha, ǵylymı-bilim beretin qorlardy, olardyń tıisti bazasyn shoǵyrlaý. Bul keshen - elimizdiń damýy úshin tyń serpin bolar edi. Bul jalpyulttyq múddemiz. Mundaı biriktirýler shetel tájirıbesi boıynsha asa tıimdi jumys isteýde. Innovatsııalyq klasterler álemdegi eń iri oqý oryndarynyń júıesinde, Oksford, Garvard, Kembrıdj, Sorbonna jáne Kalıfornııada jumys isteıdi. Mysalǵa, Oksford qurylymynda shamamen 40 zańdy tulǵalar bar», - deıdi senator H. Valıev.
