Ulttyń damýyna kedergi bolatyn ótkenniń kertartpa tustarynan bas tartý kerek - Elbasy
ASTANA. QazAqparat - Ulttyń damýyna kedergi bolatyn ótkenniń kertartpa tustarynan bas tartý kerek. Búgin «Egemen Qazaqstan» respýblıkalyq gazetinde shyqqan QR Prezıdenti Nursultan Nazarbaevtyń «Bolashaqqa baǵdar: rýhanı jańǵyrý» atty maqalasynda osylaı delingen, dep habarlaıdy QazAqparat.
Elbasynyń jazýynsha, ulttyq jańǵyrý degen uǵymnyń ózi ulttyq sananyń kemeldenýin bildiredi. Onyń eki qyry bar. Birinshiden, ulttyq sana-sezimniń kókjıegin keńeıtý. Ekinshiden, ulttyq bolmystyń ózegin saqtaı otyryp, onyń birqatar sıpattaryn ózgertý. Osy rette Elbasy qazir saltanat quryp turǵan jańǵyrý úlgileriniń qandaı qateri bolýy múmkin degen saýalǵa jaýap bergen.
«Qater jańǵyrýdy árkimniń ulttyq damý úlgisin bárine ortaq, ámbebap úlgige almastyrý retinde qarastyrýda bolyp otyr. Alaıda, ómirdiń ózi bul paıymnyń túbirimen qate ekenin kórsetip berdi. Іs júzinde árbir óńir men árbir memleket óziniń derbes damý úlgisin qalyptastyrýda. Ulttyq salt -dástúrlerimiz, tilimiz ben mýzykamyz, ádebıetimiz, joralǵylarymyz, bir sózben aıtqanda ulttyq rýhymyz boıymyzda máńgi qalýǵa tıis. Abaıdyń danalyǵy, Áýezovtiń ǵulamalyǵy, Jambyldyń jyrlary men Qurmanǵazynyń kúıleri, ǵasyrlar qoınaýynan jetken babalar úni bular bizdiń rýhanı mádenıetimizdiń bir parasy ǵana», - dep atap ótedi Memleket basshysy.
Sonymen birge, QR Prezıdentiniń paıymynsha, jańǵyrý uǵymynyń ózi meılinshe kónergen, jahandyq álemmen qabyspaıtyn keıbir daǵdylar men ádetterden arylý degendi bildiredi.
«Mysaly, jershildikti alaıyq. Árıne, týǵan jerdiń tarıhyn bilgen jáne ony maqtan etken durys. Biraq, odan da mańyzdyraq máseleni ózińniń birtutas uly ulttyń perzenti ekenińdi umytýǵa áste bolmaıdy. Biz árkim jeke basynyń qandaı da bir iske qosqan úlesi men kásibı biliktiligine qarap baǵalanatyn merıtokratııalyq qoǵam quryp jatyrmyz. Bul júıe jeń ushynan jalǵasqan tamyr-tanystyqty kótermeıdi. Osynyń bárin egjeı-tegjeıli aıtyp otyrǵandaǵy maqsatym boıymyzdaǵy jaqsy men jamandy sanamalap, terý emes. Men qazaqstandyqtardyń eshqashan buljymaıtyn eki erejeni túsinip, baıybyna barǵanyn qalaımyn. Birinshisi, ulttyq kod, ulttyq mádenıet saqtalmasa, eshqandaı jańǵyrý bolmaıdy. Ekinshisi alǵa basý úshin ulttyń damýyna kedergi bolatyn ótkenniń kertartpa tustarynan bas tartý kerek», - dedi Nursultan Nazarbaev.
