Ulttyq jobalarǵa ornyqty damý maqsattary kórsetkishteriniń 60 paıyzdan astamy engizilgen - mınıstr
«Ornyqty damý maqsattarynyń (ODM) tarıhy 2015 jyldyń 25 qyrkúıeginen bastaý alǵanyn bilesizder. Dál sol kezde Birikken Ulttar Uıymynyń Nıý-Iorktegi shtab-páterinde álem kóshbasshylary 2030 jylǵa deıingi Ornyqty damý salasyndaǵy kún tártibin qabyldady. Bul turǵyda álem memleketteriniń basshylary adamzatty kedeılikten aryltýǵa, bolashaq urpaq úshin kórkeıgen planetany saqtaýǵa, sondaı-aq ashyq jáne ınklıýzıvti qoǵam qura otyryp, barlyǵyna jaqsy ómir súrý jaǵdaılaryn qamtamasyz etýge ázir ekendigin jarııalady. Osy oraıda kedeılikti joıýǵa, teńsizdikpen kúresýge jáne klımattyń ózgerýine baılanysty máselelerdi sheshýge baǵyttalǵan 17 ornyqty damý maqsaty qamtyldy», - dedi Á. Qýantyrov.
Onyń aıtýynsha, Qazaqstanda Birikken Ulttar Uıymynyń Ornyqty damý maqsattaryn iske asyrý boıynsha ınstıtýtsıonaldyq negiz qurylǵan. Atalǵan jumysty joǵary deńgeıde júrgizý úshin Premer-Mınıstrdiń tóraǵalyǵymen Ornyqty damý maqsattary jónindegi úılestirý keńesi jumys istp jatyr. Osy baǵyttaǵy jumystardy úılestirýshi organ retinde Ulttyq ekonomıka mınıstrligi bekitilgen.
«Bizde 5 vedomstvoaralyq jumys toby tıisti baǵyttar boıynsha jumystaryn jalǵastyryp jatyr. Bul rette «Adamdar» toby – kedeılikti, genderlik teńdikti joıý, salaýatty ómirdi, bilim berýdi qamtamasyz etýge, «Órkendeý» – ınklıýzıvti ósý jáne ekonomıkalyq ózgeristerge, «Planeta» – qurlyq pen sý resýrstarynyń ekojúıelerin utymdy paıdalanýǵa, «Beıbitshilik» – qaýipsiz jáne beıbit qoǵam, myqty ınstıtýttar, sot tóreligine, sondaı-aq «Seriktestik» tobý ornyqty damý maqsattaryna qol jetkizý boıynsha memleketter arasyndaǵy ózara is-qımyldy qamtamasyz etý máselesine jaýapty. Jergilikti jerde atalǵan sharalardy júzege asyrý maqsatynda ákimdikter janynan óńirlik deńgeıde Ornyqty damý maqsattaryn júzege asyrý boıynsha jumys toptary qurylyp jatyr», - dedi mınıstr.
Onyń sózine qaraǵanda, qazirgi kezde Qazaqstandaǵy ODM monıtorıng júıesi 262 ındıkatordy qamtyp tur, sonyń arasynda 87 ındıkator Qazaqstan úshin ózekti dep tanyldy. ODM ındıkatorlarynyń derekqoryn júrgizý jónindegi jumysty uıymdastyrýdy Ulttyq statıstıka bıýrosy atqarady. Ulttyq jobalar men tujyrymdamalarǵa, damý josparlaryna ODM mańyzdy kórsetkishteriniń 60 paıyzdan astamy engizilgen.
Budan buryn habarlanǵandaı, búgin elordada Ornyqty damý maqsattarynyń iske asyrylýyna monıtorıng júrgizý jónindegi Parlamenttik komıssııanyń alǵashqy otyrysy ótti.
