Ulttyq jobalardyń burynǵy baǵdarlamadan aıyrmashylyǵy qandaı – Prezıdent keńesshisi túsinikteme berdi

NUR-SULTAN. QazAqparat – «Ult múddesi» baǵdarlamasyna qatysqan QR Prezıdentiniń Ekonomıkalyq damý máseleleri jónindegi keńesshisi Ser Sýma Chakrabartı Ulttyq jobalardyń burynǵy memlekettik baǵdarlamalardan aıyrmashylyǵy nede ekenin túsindirdi, dep habarlaıdy QazAqparat.

«Meniń oıymsha, buǵan deıin qabyldanyp, iske asyrylǵan Memlekettik baǵdarlamalar monýmentalıstik tásilge qurylǵan. Ulybrıtanııanyń úlgisin soǵan jatqyzýǵa bolady. Al ulttyq jobalar oǵan qaraǵanda ıkemdeýge beıimirek tásil deýge bolady. Memlekettik baǵdarlama aıasynda qolǵa alynǵan sharalardy Ultty jobalar arqyly ózgeshe tásilmen sońyna deıin jetkizý kózdelip otyr. Jylyna eki ret Prezıdentpen birge ulttyq jobalardy qaıtalap qarap, túzetý engizip otyramyz. Derekterdi túzetýge emes, shynaıy nátıjege kóbirek kóńil bólip otyrmyz. Memlekettik baǵdarlamalardyń basty aıyrmashylyǵy osynda», - dedi QR Prezıdentiniń keńesshisi.

Sarapshynyń aıtýynsha, ulttyq jobalardyń nátıjesin naqty kórsetkishter boıynsha baǵalaý múmkindigi bar.

«Bıýrokrattyń túsinigimen alsaq, ekonomıkanyń jetistigin qarapaıym adamnyń paıymymen ólsheýge úıretý úshin Úkimetke qysym jasaýǵa tyrysamyn deýge bolady. Qarapaıym adamnyń atqarǵan sharýaǵa kóńili tolmasa, nege ekenin túsiný kerek. Ulttyq joba men memlekettik baǵdarlamanyń negizgi aıyrmashylyǵy osy. Shyn máninde, Úkimet naqty nátıjeni qamtamasyz etý kerektigin biledi dep oılaımyn. Tek iske asyrǵan kezde muqııat bolýy kerek. Biz adamdarǵa qyzmet etýimiz kerek. Halyq olarǵa kim qyzmet etip jatqanyn bilýi kerek. Al biz tıisti ózgerister engizýimiz kerek», - dedi Sýma Chakrabartı.