Ulttyq jańǵyrý sananyń kemeldenýin bildiredi
ASTANA. QazAqparat - Joǵarǵy Sotta Memleket basshysynyń «Bolashaqqa baǵdar: rýhanı jańǵyrý» atty maqalasyn búkilhalyqtyq talqylaý sheńberinde «Rýhanı jańǵyrý - Máńgilik El bolýdyń kepili» atty dóńgelek ústel ótti. Jıynǵa qatysýshylar sot júıesine, sot júıesindegi memlekettik tildiń qoldanys aıasyn keńeıtý jumystaryn júrgizýge qatysty tıisti usynystar ázirledi.
Jıynǵa Parlament Senaty Tóraǵasynyń orynbasary Bektas Beknazarov, Qazaqstan Respýblıkasy Prezıdentiniń janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııanyń hatshysy, Prezıdent Ákimshiligi Іshki saıasat bóliminiń meńgerýshisi Aıda Balaeva jáne elimizdiń ǵylymı-shyǵarmashylyq ıntellıgentsııasynyń ókilderi, Joǵarǵy Sot organy apparatynyń basshylyǵy men qyzmetkerleri, sondaı-aq Sot tóreligi akademııasynyń professor-oqytýshylar quramy men magıstranttary qatysty.
Dóńgelek ústel jumysyn ashqan Joǵarǵy Sot Tóraǵasy Qaırat Mámı Memleket basshysynyń baǵdarlamalyq maqalasynda aıtylǵan memleket pen qoǵamnyń aldyna qoıyp otyrǵan maqsattary men mindetteriniń mańyzy orasan ekenin, sonyń ishinde jastar bolashaǵyna baǵyt-baǵdar berýdiń máni zor ekenin atap ótti.
«Maqaladaǵy kemel oılardy barshańyzben bólisý úshin dóńgelek ústelge jınalyp otyrmyz. Baǵdarlamada qoǵamdyq sanany jańǵyrtýdyń birneshe baǵyty aıqyn aıtylǵan. Ulttyq jańǵyrý degen uǵymnyń ózi ulttyq sananyń kemeldenýin bildiredi. Tutas ult bolyp uıysyp otyrǵan qazaqstandyqtardyń berekesi men birliginiń negizi qazaq ultynyń bolmys-bitiminde jatyr. Sonyń ishinde halqymyzdyń san ǵasyrlyq salt-dástúriniń orny erekshe. Ózderińizge málim, elimizdiń sot júıesi Maıqy bı babamyz negizin qalaǵan bıler sotynan bastaý alady. Elbasy aıtqandaı, jahandaný dáýirinde biz jat ıdeologııalardyń yqpalyna ózimizdiń ulttyq qundylyqtarymyz arqyly ǵana tótep bere alamyz. Sondyqtan da bılerden qalǵan ádil tórelik etý dástúrin keńinen nasıhattaýymyz kerek. Osy oraıda, alash qaıratkeri Mirjaqyp Dýlatovtyń «Zań ádet-ǵurypqa qaıshy kelse, úlken aıaqqa tar etik kıgenmen birdeı» degen sózin búgingi bolashaq zańgerler bilgeni jón», dedi Joǵarǵy Sot Tóraǵasy Qaırat Mámı.
Qazaqstan Respýblıkasy Joǵarǵy Sotynyń sýdıasy Baǵlan Demesinuly Memleket basshysynyń «Bolashaqqa baǵdar: rýhanı jańǵyrý» atty baǵdarlamalyq maqalasyna oraı óz usynysyn aıtty: «Búginde elimiz ekonomıkalyq damýdyń shyrqaý bıigine kóterildi. Qazaqstan óziniń halyqaralyq damý baǵytynda úlken dárejelerge ıe boldy. Maqalada atap kórsetilgendeı, bizdiń bolashaǵymyz - qoǵam jetistikterin ári qaraı jalǵastyratyn, reformalyq úderisterdi ıgeretin jastarymyz. Respýblıkanyń saıası bıligindegi sot júıesiniń orny erekshe. Qoǵam tepe-teńdigin saqtaý men elimizdiń áleýmettik, ekonomıkalyq damý barysynda sot júıesiniń róli basym», degen Baǵlan Demesinuly qazaq ómirindegi bitimgershilik turǵysynan mańyzdy ról atqarǵan dástúrli bıler soty ınstıtýtyn keńinen nasıhattaýdy usyndy. «Bizdiń qazaq ultynda álemde teńdesi joq bıler soty, quqyqtyq ınstıtýt bar ekenin bári biledi. Bıler ınstıtýtynyń tájirıbesin búgingi jańa zamanǵa saı qoldanýdyń mańyzy zor. «Qazaqstandaǵy 100 jańa esim» jobasynan quqyqtaný salasyna erekshe oryn tııýi tıis. Óıtkeni, sot júıesiniń damýyna eńbegi sińgen sýdıalar men sot qyzmetkerleri jetkilikti ǵoı dep oılaımyn», dedi Joǵarǵy Sot sýdıasy.
Іs-shara sońynda qatysýshylardyń tujyrymdy oılary men usynystarynyń negizinde qarar qabyldanyp, sot júıesindegi memlekettik tildiń qoldanys aıasyn keńeıtý jumystaryn júrgizý, Sot tóreligi akademııasynyń oqý baǵdarlamasyna «Qazaq bıleriniń sheshendik óneri» atty arnaıy kýrs engizý, sot aýdarmashylarynyń biliktiligin arttyrý maqsatynda «Úzdik sot aýdarmashysy» respýblıkalyq konkýrsyn ótkizý, Elbasynyń latyn álipbıine kóshý týraly tapsyrmasy boıynsha daıyndyq jumystaryn pysyqtaý jumystaryna qatysty birqatar usynys daıyndaldy. Qararda toptastyrylǵan usynystar Qazaqstan Respýblıkasy Prezıdentiniń janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııaǵa is-sharalardyń júzege asýyn úılestirý usynylatyn bolady.
