Ulttyq jáne ekonomıkalyq qaýipsizdikke qater tóngen jaǵdaıda jer qoınaýyn paıdalanýǵa qatysty kelisimsharttardyń kúshi joıylýy múmkin - S. Myńbaev
ASTANA. Qańtardyń 26-sy. QazAqparat /Qanat Mámetqazyuly/ - Ulttyq jáne ekonomıkalyq qaýipsizdikke qater tóngen jaǵdaıda jer qoınaýyn paıdalanýǵa qatysty jasalǵan kelisimsharttardyń kúshi joıylýy múmkin.
Búgin QR Parlamenti Májilisinde «Jer qoınaýy men jer qoınaýyn paıdalaný týraly» zań jobasyn talqylaý barysynda depýtattardyń suraǵyna jaýap bergen Energetıka jáne mıneraldyq resýrstar mınıstri Saýat Myńbaev osylaı málim etti, dep habarlaıdy QazAqparat.
«Qoldanystaǵy zańda elimizge ulttyq jáne ekonomıkalyq qaýipsizdikke qater tóngen jaǵdaıda respýblıka birjaqty tártippen jer qoınaýyn paıdalanýshylarmen jasaǵan kelisimshartyn buza alady degen norma qamtylǵan. Sonymen birge, Memleket basshysynyń keshegi kúni Úkimettiń jyl qorytyndysyna baılanysty bergen tapsyrmalaryna sáıkes, bul máseleni sheshý úshin birshama talqylaýlar bolýy kerek. Al eger salyq salýǵa qatysty úsh-tórt kompanııaǵa qatysty jasalǵan kelisimsharttarǵa keletin bolsaq, onda munyń bir ǵana joly bar - bul sondaı kelisimsharttardyń kúshin joıý», dedi mınıstr. Onyń aıtýynsha, iri jer qoınaýyn paıdalanýshy kompanııalarmen jasalǵan kelisimsharttarda, onyń ishinde Qashaǵan jobasyna qatysty kelisimshartta ulttyq, ekonomıkalyq qaýipke qatysty respýblıkanyń ustanatyn bundaı áreketteri anyq kórsetilgen.
