Ulttyq zertteý ýnıversıteti ataǵyna laıyqtalǵan oqý oryndarynyń bıýdjetine Úkimetten qosymsha 2 mıllıard teńge bólinedi - B.Jumaǵulov
ALMATY. 27 mamyr. QazAqparat (Ádilet Musahaev) - Mundaı oqý ǵımarattarynyń boı kóterýi, ýnıversıtettiń damýy, jańa maqsattardyń barlyǵy Elbasynyń tapsyrmasymen ǵylymdy, bilimdi damytýǵa jasalynyp jatqan ıgi sharalar dep bilemin.
Búgin QR Bilim jáne ǵylym mınıstri Baqytjan Jumaǵulov QazUÝ qalashyǵynda ashylǵan Mehanıka-matematıka fakýltetiniń jańa oqý ǵımaratymen jáne ýnıversıtette atqarylyp jatqan ınnovatsııalyq jobalarmen tanysý barysynda osylaı aıtty.
Mınıstr Ǵylym týraly jańa zań qabyldanǵaly da birshama tyń jumystar atqarylyp jatqandyǵyn aıtyp ótti. «Alda bul salada taǵy bir zań ázirlenýde. Elbasy Joldaýynda aıtqandaı, Qazaqstanda eki joǵary oqý orny ulttyq zertteý ýnıversıtetine aınalýy kerek. Ol úshin talap ta, mindet te, jaýapkershilik óte joǵary. Ulttyq zertteý ýnıversıteti degenimiz - ǵylym, bilim, ınnovatsııa qatar júrgiziletin orda. Bul tusta ál-Farabı atyndaǵy Qazaq ulttyq ýnıversıteti de, basqa da joǵary oqý oryndary Elbasy tapsyrmasyn atqarýǵa barynsha tyrysyp jatyr», -dedi óz sózinde mınsıtr.
Sonymen qatar ol qanshama bilim ordalarynyń ishinen sýyrylyp alǵa shyǵý, ulttyq zertteý ýnıversıtetine aınalý úshin joǵary kórsetkishter údesinen shyǵý kerektigin de jetkizdi. «Elimizde 148 ýnıversıtet bar eken, sapany jaqsartý úshin 20-25 JOO-ny ǵana qaldyrý kerek",- deıdi B. Jumaǵulov.
Sondaı-aq, Baqytjan Tursynuly alda ulttyq zertteý ýnıversıteti ataǵyna laıyqtalǵan oqý oryndary bıýdjetine Úkimet tarapynan qosymsha 2 mıllıard teńge qarjy bólinetindigin aıtty. Otandyq ýnıversıtetter aldynda eń úzdik eki ulttyq zertteý ýnıversıtetine aınalý mindetimen qosa, QR Bilim jáne ǵylym mınıstri otandyq joǵary bilim berý keńistiginde 10 ýnıversıtetti ınnovatsııalyq jolmen júretin bilim ordalaryna aınaldyrý mindeti turǵandyǵyn da tilge tıek etti. Mınıstrdiń bul baıandamasy otandyq bilim jáne ǵylym keńistiginiń ǵalymdaryna álemdik damyǵan kósh basshy ýnıversıtetter qatarynan oryn alýda qandaı maqsatty oryndaý kerektigin taǵy bir aıqyndap berdi.
