Ulttyq valıýtamen saýda-sattyq júrgizý ne úshin qajet - Elbasynyń jaýaby
ShYU sammıti barysynda Elbasy ShYU-nyń barlyq elderiniń ulttyq valıýtasynda ózara esep aıyrysýǵa kóshýdi ekonomıkanyń qaýipsizdik aspektileriniń biri retinde oılastyrǵan jón ekendigin aıtqan bolatyn. Suhbat barysynda Memleket basshysy osy máselege keńinen toqtaldy.
«Bul baıaǵydan kóterilip kele jatqan másele. Reseı men Qytaı arasyndaǵy saýda-sattyq ótken jyly 80 mlrd dollarǵa jetti. Amerıkalyq dollar da kirpııaz. Ne istegisi kelse, sony jasaıdy deýge de bolady. Qytaı men Qazaqstan arasyndaǵy saýdany teńgemen jáne ıýanmen júrgizsek, bizge paıdaly bolar edi. Bul tek bizdiń ǵana máselemiz emes. Búkil óńir, Reseı bul jumystardy júrgizip keledi jáne ol ońaı da emes. Olar bizden teńgemen, biz olardan ıýanmen satyp alamyz. Ol úshin atalǵan qarajattyń bazasyn qurý qajet. Bankterde mundaı aqsha, qandaı da bir depozıt bolýy tıis», - dedi Nursultan Nazarbaev.
QR Prezıdentiniń aıtýynsha, saýda-sattyqty ulttyq valıýtada júrgizýdiń keleshegi bar.
«Men mundaı jelini qoldaımyn. Bul tıimdi bolady. Tipti bizde Qazaqstan men Reseı arasynda rýbl men teńgege kóshý qajet degen pikir bar. 100 paıyz bola qoımas. Sebebi batystan ımport alatyn bolsaq, báribir de dollar qajet», - dedi Memleket basshysy.
Memleket basshysy bul baǵytta tıisti tapsyrmalardyń berilgenin jáne ulttyq valıýtada saýda-sattyq jasaý naqty bıyl engizilmeıtindigin aıtty.
«ShYU-ǵa múshe elderdiń eshqaısy qarsylyq tanytqan joq. Endi qarjygerler birlesip jumys istep, bizge usynys engizýi tıis. Aǵymdaǵy jyly anyq bolmaıdy», - dedi Elbasy.