Ulttyq valıýtadaǵy depozıtter boıynsha kepildik berilgen ótemniń eń joǵarǵy somasy 10 mln. teńgege deıin ulǵaıtyldy
ASTANA. QazAqparat - Ulttyq valıýtadaǵy depozıtter boıynsha kepildik berilgen ótemniń eń joǵarǵy somasy 10 mln. teńgege deıin ulǵaıtyldy, dep habarlaıdy «Qazaqstannyń depozıtterge kepildik berý qorynan».
Aıta keteıik, 27 sáýirde Qazaqstan Respýblıkasynyń Prezıdenti N.Á.Nazarbaev «Qazaqstan Respýblıkasynyń keıbir zańnamalyq aktilerine saqtandyrý jáne ıslamdyq qarjylandyrý máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zańyna qol qoıdy.
«Bul zańǵa sáıkes depozıtterge mindetti kepildik berý júıesine qatysýshy bankterde ornalastyrylǵan jeke tulǵalardyń depozıtteri boıynsha kepildik berilgen ótemniń eń joǵarǵy somasy 5 mıllıon teńgeden 10 mıllıon teńgege deıin ulǵaıtyldy. Ulttyq valıýtanyń shetel valıýtasyna qaraǵanda basymdylyǵyn qamtamasyz etý maqsatynda shetel valıýtasyndaǵy depozıtter boıynsha kepildik berilgen ótemniń mólsheri burynǵy deńgeıde qaldyryldy, ıaǵnı 5 mıllıon teńgeden aspaıdy», delingen habarlamada.
Osylaısha, qatysýshy bank májbúrlep taratylǵan jaǵdaıda Qazaqstannyń depozıtterge kepildik berý qory depozıtor - jeke tulǵalarǵa ulttyq valıýtadaǵy kepildik berilgen depozıtteri boıynsha on mıllıon teńge jáne shetel valıýtasyndaǵy depozıtter boıynsha bes mıllıon teńgeden aspaıtyn mólsherde bir depozıtorǵa bir qatysýshy bank boıynsha kepildik berilgen ótem tóleıdi.
Sondaı-aq zań boıynsha depozıtor bir qatysýshy bankte túri men valıýtasy boıynsha ártúrli birneshe kepildik berilgen depozıt ashqan jaǵdaıda, Qazaqstannyń depozıtterge kepildik berý qory olar boıynsha on mıllıon teńgeden aspaıtyn somada jıyntyq kepildik berilgen ótemdi tóleıdi. Atap ótilgendeı, Islam bankin qospaǵanda, Qazaqstan Respýblıkasyndaǵy barlyq 37 ekinshi deńgeıdegi bankter depozıtterge mindetti kepildik berý júıesiniń qatysýshylary bolyp tabylady.
Qarjy júıesiniń turaqtylyǵyn qamtamasyz etý, qazaqstandyq bank júıesine senimdi qoldaý kórsetý jáne depozıtorlardyń quqyqtary men zańdy múddelerin qorǵaý maqsatynda Qazaqstannyń depozıtterge kepildik berý qory qatysýshy bankterde ornalastyrylǵan jeke tulǵalardyń depozıtterine kepildik beredi, ıaǵnı jeke tulǵalardyń barlyq banktik shottaryndaǵy, onyń ishinde tólem kartalaryn qoldanýymen, aqshasynynyń qaıtarylýyna kepildik beredi.
2015 jyldyń 1 naýryzyndaǵy jaǵdaıǵa sáıkes qatysýshy bankterde ornalastyrylǵan jeke tulǵalardyń banktik shottarynyń (depozıtteriniń) 99,6%-ǵa jýyǵy tolyq kólemde kepildendirilgen. Osylaısha, Qazaqstannyń depozıtterge kepildik berý qory zańda qarastyrylǵan óz qyzmetterin oryndaý úshin barlyq qajetti resýrstarǵa ıe.
