Ulttyq valıýtadaǵy depozıtter bir aıda 4,5 paıyzǵa artty

NUR-SULTAN. QazAqparat – Qazaqstanda depozıtterdiń somasy bir aıda 7,6 paıyzǵa ulǵaıdy. Bul týraly QR Ulttyq bankinen málim etti, dep habarlaıdy QazAqparat tilshisi.

«Rezıdentterdiń depozıttik uıymdardaǵy depozıtteriniń kólemi bir aıda 7,6 paıyzǵa artyp (jyldyq mánde ósý 8,1% boldy), 2022 jylǵy maýsymnyń sońynda 27 162,9 mlrd teńge boldy. Zańdy tulǵalardyń depozıtteri bir aıda 13 801,2 mlrd teńgege deıin 8,2 paıyzǵa ulǵaıdy, jeke tulǵalardyń depozıtteri 13 361,7 mlrd teńgege deıin 7 paıyzǵa ósti», - delingen Ulttyq bank málimetinde.

Ulttyq valıýtadaǵy depozıtterdiń kólemi bir aıda 17 581,2 mlrd teńgege deıin 4,5 paıyzǵa artty. Shetel valıýtasyndaǵy depozıtterdiń kólemi 9 581,7 mlrd teńgege deıin 13,9 paıyzǵa ósti. Dollarlandyrý deńgeıi 2022 jylǵy maýsymnyń sońynda 35,3% (2021 jylǵy jeltoqsanda – 36%) boldy.

«Zańdy tulǵalardyń ulttyq valıýtadaǵy depozıtteri 2022 jylǵy maýsymda 8 715,6 mlrd teńgege deıin 3,2 paıyzǵa ósti, shetel valıýtasyndaǵy depozıtter 5 085,6 mlrd teńgege deıin 18,1 paıyzǵa artty. Jeke tulǵalardyń teńgedegi depozıtteri 8 865,6 mlrd teńgege deıin 5,8 paıyzǵa ulǵaıdy, al shetel valıýtasyndaǵy depozıtteri 4 496,1 mlrd teńgege deıin 9,5 paıyzǵa artty», - dep atalyp ótken UB aqparatynda.

Budan buryn habarlanǵandaı, bıyl maýsym aıynda Qazaqstanda AQSh dollaryn satyp alý qarqyny báseńdedi.