Ulttyq ýnıversıtetterge oqýǵa túsý úshin talapker UBT-dan 70 balldan kem almaýy tıis
ASTANA. 11 aqpan. QazAqparat - Ulttyq ýnıversıtetterge oqýǵa túsý úshin talapker Ulttyq biryńǵaı testileýden 70 balldan kem almaýy tıis. Bul týraly QazAqparat agenttigine Bilim jáne ǵylym mınıstrliginiń baspasóz qyzmeti habarlady.
Atap aıtqanda, osyndaı talap elimizdegi 9 Ulttyq joǵary oqý oryndaryna qatysty engizilip otyr. Olardyń ishinde L.N. Gýmılev atyndaǵy Eýrazııa ulttyq ýnıversıteti, Júrgenov atyndaǵy Qazaq ulttyq óner akademııasy, Qurmanǵazy atyndaǵy Qazaq ulttyq konservatorııasy, Qazaq ulttyq agrarlyq ýnıversıteti, S.D. Asfendııarov atyndaǵy Qazaq ulttyq medıtsınalyq ýnıversıteti, Abaı atyndaǵy Qazaq ulttyq pedagogıkalyq ýnıversıteti, Q. I. Sátbaev atyndaǵy Qazaq ulttyq tehnıkalyq ýnıversıteti, Ál-Farabı atyndaǵy Qazaq ulttyq ýnıversıteti, Qazaq ulttyq óner ýnıversıteti oqý oryndary qamtylǵan. Bul joǵary oqý oryndary Astana men Almaty qalalarynda ornalasqan.
Al Qazaqstandaǵy qalǵan memlekettik nemese jekemenshik oqý oryndaryna túsýdiń shekti kórsetkishi 60 ball deńgeıinde qalady.
