Ulttyq ulannyń jeke quramy saılaýda daýys berýdi aıaqtady

ASTANA. QazAqparat – QR Ulttyq ulanynyń jeke quramy prezıdent saılaýynda daýys berýdi aıaqtady, dep habarlaıdy QazAqparat vedomstvonyń baspasóz qyzmetine silteme jasap.

Tańǵy saǵat 6.00-de 5573 áskerı bólimindegi №226 daýys berý ýchaskesine alǵashqylardyń biri bolyp QR Іshki ister mınıstriniń orynbasary – Ulttyq ulannyń Bas qolbasshysy general-maıor Erkin Botaqanov kelip, daýys berdi.

«Quqyqtyq tártip áskerleriniń áskerı qyzmetshileri barlyq ýaqytta joǵary azamattyq jaýapkershilik pen patrıottyq rýh tanytady. Ulttyq ulan elimizdiń tynyshtyǵy men turaqtylyǵyna jaýap beretin áskerı qurylym. Búgingi saılaýǵa árbir áskerı qyzmetshi belsendi qatysyp, óz kandıdatyna daýys beretinine senimdimin», - dedi Erkin Botaqanov.

Ulttyq ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary polkovnık Qaırat Úmbetovtyń aıtýynsha, áskerı bólimderde ashylǵan saılaý ýchaskelerinde daýys berýshilerdiń belsendiligi óte joǵary boldy. Saılaýǵa tek áskerı qyzmetshilerdiń ózderi ǵana emes, olardyń otbasy músheleri de belsendi qatysty.

Áskerı bólimderdiń Otan aldyndaǵy azamattyq boryshyn ótep júrgen jaýyngerleri men Ulttyq ulan akademııasynyń kýrsanttary áskerı qalashyqtar aýmaǵynda qurylǵan 36 saılaý ýchaskesinde daýys berdi. Olardyń arasynda daýys berýge alǵash ret qatysqandar kóp. Alǵashqy saılaýshylarǵa arnaıy syılyqtar tabystaldy.

Foto: QR Ulttyq ulany baspasóz qyzmeti