Ulttyq ulannyń laýazymdy tulǵalary para alǵany úshin sottaldy

NUR-SULTAN. QazAqparat – QR Ulttyq ulannyń «5517 áskerı bólimi» RMM-niń laýazymdy birqatar tulǵasy para alǵany úshin sottaldy. Bul týraly QazAqparat Agenttiktiń baspasóz qyzmetine silteme jasap habarlaıdy.

«Batys Qazaqstan oblysynyń sybaılas jemqorlyqqa qarsy qyzmeti QR Ulttyq ulanynyń «5517 áskerı bólimi» RMM bólim komandıriniń tyl jónindegi orynbasary maıor J.M.Omarovqa jáne atalǵan RMM-niń kıim-keshek qyzmeti bóliminiń bastyǵy leıtenant T.B. Qydyrovqa qatysty para alý faktisi boıynsha sotqa deıingi tergeýdi aıaqtady. Olar jeke kompanııa dırektorynan oryndalǵan jumystar aktilerine kedergisiz qol qoıǵany jáne aldaǵy ýaqytta da kórsetetin kómegi úshin 300 myń teńge kóleminde para aldy degen kúdikke ilingen bolatyn», - delingen habarlamada.

Aǵymdaǵy jyldyń 7 qazanynda Aqtóbe garnızony áskerı sotynyń úkimimen Omarov para alǵany úshin kináli dep tanylyp, 7 jyl 2 aı merzimge bas bostandyǵynan aıyryldy. Al Qydyrovqa 6 mln teńge somasynda aıyppul tóleý jazasy belgilendi.

Sottalǵandar memlekettik qyzmette qyzmet atqarý quqyǵynan, sondaı-aq áskerı ataqtarynan ómir boıyna aıyryldy.